***
Fyrri aukaspurning.
Hver er hin dapra kona á myndinni hér að ofan?
***
Aðalspurningar:
1. Í hvaða landi er borgin Þessalónika eða Saloniki?
2. Hvaða dagblað var stofnað í Reykjavík árið 1910?
3. Hvaða gyðja í norrænni goðafræði gætir eplanna, sem tryggja goðunum eilífa æsku?
4. Hvað af fótboltaliðunum í London hefur oftast unnið enska meistaratitilinn frá upphafi?
5. Hvað hét yngri bróðir Grettis Ásmundarsonar, sem fylgdi honum að lokum í útlegð og dauða?
6. Fyrsti forsætisráðherra í landi nokkru hét Pehr Svinhufvud. Seinna varð hann forseti landsins. Hvaða land var þetta?
7. Marla Maples heitir bandarísk leikkona sem reyndar þykir ekki meðal hinna öflugustu í sínu fagi. Hún hefur aðallega leikið í frekar klénum sjónvarpsþáttum. Enda er tilkall Maples til frægðar allt annað en það sem hún hefur fengist við í vinnunni. Hvað er Marla Maples frægust fyrir?
8. Stromboli heitir náttúrufyrirbrigði eitt. Fyrir hvað er það frægt?
9. Hver af þessum eyjum í Kyrrahafi er sjálfstætt ríki: Galapagos-eyjar, Nauru, Páskaeyja (Rapa Nui), Pitcairn eða Tahiti?
10. Hvaða á fellur til sjávar rétt við borgina New Orleans?
***
Seinni aukaspurning.
Hvað heita herramennirnir á þessu flotta mótorhjóli á myndinni hér að neðan?
Myndin var tekin árið 1919.
Athugið að þið eigið í rauninni alls ekki að þekkja mennina í sjón, auk þess sem myndgæðin eru ekki mikil.
Það þarf því svolítið hugmyndaflug til að leysa þessa þraut.
En það á alveg að vera hægt samt!
***
Svör við aðalspurningum:
1. Grikklandi.
2. Vísir.
3. Iðunn.
4. Arsenal.
5. Illugi.
6. Finnland.
7. Hún var eiginkona Donald Trumps númer tvö.
8. Þar eru nær stöðug eldgos. (Þetta er eyja nálægt Ítalíuströndum.)
9. Nauru.
10. Mississippi.
***
Svör við aukaspurningum.
Konan á efri myndinni er Alexandra, síðasta keisaraynja Rússlands.
Hún hafði svo sannarlega ástæðu til að vera döpur enda fór allt hennar líf í hunda, ekki síst fyrir tilverknað hennar sjálfrar.
Á neðri myndinni má sjá þá félaga Harley og Davidson á einu af fyrstu mótorhjólunum sem þeir framleiddu í sameiningu.
***
Spurningaþrautin
Fyrri grein
254. spurningaþraut: Músíksystur, leikkonur, ein höfuðborg, matsölustaður
Næsta grein
Athugasemdir