Sóknargjöld til trúfélaga hækka um 280 milljónir króna miðað við upphaflegt fjárlagafrumvarp verði breytingar sem meirihluti efnhags- og viðskiptanefndar leggur til samþykktar. Hækka þannig sóknargjöld um 100 krónur á mánuði fyrir hvern einstakling 16 ára og eldri árið 2021, úr 980 krónur í 1.080 krónur, eða um tæp 11 prósent miðað við fyrra ár.

Meirihlutann skipa Óli Björn Kárason, Brynjar Níelsson og Bryndís Haraldsdóttir úr Sjálfstæðisflokki, Ólafur Þór Gunnarsson úr Vinstri grænum og Willum Þór Þórsson úr Framsóknarflokki.

Hækkunin sem upphaflega átti að vera 5 krónur á einstakling, úr 975 krónum í 980 krónur, þykir ekki nógu mikil að mati meirihlutans þar sem í umsögnum sem bárust nefndinni hafi komið fram sjónarmið um að hækkunin væri ekki nægileg miðað við meginreglu laga um sóknargjöld. Þjóðkirkjan og Sóknasamband Íslands sendu inn umsagnir þar sem rök voru færð fyrir því að gjaldið ætti nú að standa í 1.815 krónum.

Félagið Vantrú, sem beitir sér gegn áhrifum skipulagðra trúarbragða í samfélaginu, mótmælir þessari hækkun á meðan skorið er niður í mikilvægum málaflokkum. „Trúfélög ættu auðvitað helst að vera rekin án aðkomu ríkisins, en á meðan settar eru aðhaldskröfur á heilbrigðisstofnanir er skammarlegt að hækka framlög ríkisins til Þjóðkirkjunnar og annarra trúfélaga,“ segir í tilkynningu. „Það er ömurlegt að þingmenn á borð við Willum Þór Þórsson fullyrði í fjölmiðlum að á næsta ári verið bara skorið niður um 400 milljónir hjá Landsspítalanum á meðan það er hægt að gefa Þjóðkirkjunni og öðrum trúfélögum árlega 280 milljónir til viðbótar.

Það er einnig ótrúlegt að fulltrúi VG í nefndinni, Ólafur Þór Gunnarsson, sem er læknir, telji það eðlilegt að hækka framlög ríkisins til reksturs trúfélaga um leið og framlög ríkisins til reksturs heilbrigðiskerfisins eru skorin niður. Í könnunum sem hafa verið gerðar um forgangsröðun fjármála ríkisins setja landsmenn heilbrigðismál í fyrsta sæti og trúmál í neðsta. Við vonum innilega að þessi tillaga nefndarmanna verði felld á Alþingi enda örugglega í engu samræmi við vilja þjóðarinnar.“