Tónlistarmaðurinn Ólafur Arnalds gaf út fimmtu plötu sína, some kind of peace, 6. nóvember síðastliðinn en hún hefur strax ratað í 17. sæti vinsældalista Bretlands. Þetta er fyrsta plata hans sem ratar þangað, en það þykir óvenjulegt fyrir nýklassíska plötu að ná svona miklum vinsældum á meðal almennings. Ólafur vann til BAFTA-verðlauna árið 2014 fyrir frumsamda tónlist í sjónvarpsþáttunum Broadchurch og var tilnefndur til Emmy-verðlauna í ár fyrir titillag Defending Jacob-þáttaraðarinnar.

Platan some kind of peace hefur fengið góða dóma víða hjá erlendum miðlum; hún fékk 9/10 hjá tónlistartímaritunum Clash og The Line of Best Fit, sem og jákvæðan dóm hjá New Statesman, en hefur ekki enn fengið gagnrýni hjá íslenskum miðlum. Í viðtali frá 2015 sagðist Ólafur ekki hafa fengið neina umfjöllun árum saman frá íslenskum fjölmiðlum.

„Það vildi ekkert dagblað eða íslensk hátíð tala við mig þangað til ég væri búinn að gera eitthvað úti,“ sagði hann. „Ég var hérna að gera mitt og komst aldrei inn á neina af þessum hátíðum heima fyrr en ég var búinn að taka nokkra túra úti. Þegar það var allt í einu búið að skrifa heilsíðu um mig í Guardian þá var loksins hringt í mig frá Mogganum. Mér finnst þetta stundum svolítið skrítið, það er eins og Íslendingum finnist ekkert vera merkilegt fyrr en útlendingar eru búnir að viðurkenna og samþykkja það.“