Stærstu atvinnuhúsnæðisfélögin á Íslandi, Eik, Reginn og Reitir, hafa fundið fyrir áhrifum COVID-19 faraldursins, en standa þó enn sterkt fjárhagslega að því fram kemur í Fjámálastöðugleika, nýútgefnu riti Seðlabankans. „Félögin ættu því að geta staðið af sér nokkurt áfall og geta jafnframt stuðlað að auknu jafnvægi á markaðinum með tímabundnum stuðningi við leigutaka sína.“
Félögin þrjú eiga mikið af atvinnuhúsnæði í miðborginni og víðar og eru að stórum hluta í eigu íslensku lífeyrissjóðanna. Nemur virði eignasafns þeirra hundruðum milljarða. „Félögin hafa undanfarna mánuði unnið með þeim leigutökum sínum sem orðið hafa fyrir mestum efnahagslegu áhrifum vegna faraldursins,“ segir í riti Seðlabankans. „Þar ber helst að nefna félög í hótelrekstri en einnig hafa veitingahús, skemmtistaðir og fleiri aðilar orðið fyrir verulegu tekjutapi vegna sóttvarnaraðgerða stjórnvalda. Þetta hefur síðan áhrif á sjóðstreymi fasteignafélaganna, hvort sem um er að ræða lækkun, niðurfellingu eða frestun leigu. Búast má við að stór hluti áhrifanna sé enn ekki kominn fram í bókum þeirra.“
Fasteignafélögin standa enn sterkt fjárhagslega
Segir Seðlabankinn að félögin hafi staðið vörð um lausafjárstöðu sína með frestun greiðslna af lánum, nýjum skuldabréfaútgáfum og útgáfu nýs hlutafjár. Þá hafi félögin einnig frestað framkvæmdum sem stóð til að ráðst í á árinu. Ávöxtun fjárfestingareigna þeirra hefur ekki lækkað mikið og nam 5,1 prósenti á öðrum ársfjórðungi. Félögin hafa hins vegar fært niður virði eigna sinna um tæpa 3 milljarða króna, sem nemur 0,8 prósent af heildarverðmæti eignanna í byrjun árs. Tengist virðislækkunin að langmestu leyti hótelum.
„Dragist viðspyrnan á langinn gætu neikvæð áhrif færst út til fleiri tegunda atvinnuhúsnæðis og frekari virðislækkanir átt sér stað með tilheyrandi áhrifum á eiginfjárhlutföll. Félögin standa þó enn sem komið er sterkt fjárhagslega og hefur faraldurinn ekki haft veruleg áhrif á eiginfjárstöðu þeirra.“
Athugasemdir