Margir urðu varir við stóra far­þega­þotu sem flaug í lág­flugi yfir miðbæ og Vesturbæ Reykja­víkur í hádeg­inu. Í Facebook hóp Vest­ur­bæ­inga segja íbúar að gler hafi nötrað í rúðum þegar þotan fór yfir og töldu margir að hún væri að reyna að nauð­lenda á Reykja­vík­ur­flug­velli. Samkvæmt vef­síðu sem birtir flug­feril far­þega­flug­véla fór vélin í rúm­lega 200 metra hæð yfir mið­borg Reykja­víkur.

Fyrsti umræðu­þráð­ur­inn datt inn um leið og þotan flaug yfir þar sem spurt var: „Er ein­hver júm­bó­þota að reyna að nauð­lenda á Reykja­vík­ur­flug­velli?“

Samkvæmt upp­lýs­ingum frá Isavia var um að ræða lág­flug nýrrar þotu flug­fé­lags­ins Atlanta. Var hún ekki að reyna að lenda heldur fljúga lág­flug yfir höf­uð­stöðvar félags­ins til að fagna kaup­unum. Alvana­legt sé að gefið sé leyfi fyrir slíku lág­flugi þó að oft­ast sé um að ræða minni vélar sem færri taki eftir. Útilokað sé fyrir þotur af þess­ari stærð að lenda á Reykja­vík­ur­flug­velli yfir höfuð.

Mörgum Vest­ur­bæ­ingum var hins vegar tölu­vert brugðið, sögð­ust hafa verið komnir á fremsta hlunn með að leita skjóls undir hús­gögnum og einn segir: „Ekkert smá flykki fór niður, hitti ekki á völl­inn, og svo bara beint upp í loftið aftur.“

Annar bætir við: „Galið hel­víti, nötr­aði allt hjá mér í Kópavogi, varð skít­hræddur. Þetta fluglið er algjör­lega á ann­ari plánetu.“

Starfs­maður Isavia í flug­turni sagð­ist í sam­tali við Stundina skilja að leik­mönnum gæti verið brugðið ef þeir mistúlk­uðu aðstæður en þeir sem þekki til flugs sjái strax að allt hafi verið með eðli­legum hætti. Vel hafi verið fylgst með því að öllum örygg­is­stöðlum væri fylgt til hins ítrasta.

Þeir sem tjá sig í hópnum Flugnördar á Facebook eru almennt nokkuð kunn­ugir flugi, eins og nafnið gefur til kynna, en þar var sumum einnig brugðið.

Með því að skrá sig í umræðu­hóp­inn má meðal ann­ars sjá myndir og mynd­bönd sem hafa verið sett inn af lág­flug­inu. „Djö var þetta klikkað!“ segir einn flugnörd, annar segir: „Sá hana hérna líka í Selja­hverf­inu, hún var beint fyrir utan hjá mér! Fokking hellað að sjá þetta!“

Honum er svarað á þræð­inum: „Já sama hér, beint fyrir ofan Jórusel þar sem ég bý! Það var ótrú­legt að sjá hana fljúga svo yfir Vatns­enda­hæð og taka vinstri beygju í þess­ari hæð. Hefur örugg­lega ekki verið hærra en 900-1000 m frá jörðu.“

Aðrir flugnördar segja þetta storm í vatns­glasi, þetta hafi verið fögur sjón og vélin í 1.500 feta hæð eins og reglur geri ráð fyrir. 

Vefsíðan Flightaware sýnir hins vegar að vélin fór neðst niður í 213 metra hæð yfir Reykja­vík, eða um 700 fet. Þá var hún hins vegar yfir Reykja­vík­ur­flug­velli. Vélin tók skarpa dífu yfir Vesturbæ og Miðborg Reykja­víkur, en yfir Reykja­vík­ur­tjörn var vélin komin niður í 236 metra. 

Aftur var hún komin yfir 1.500 fetin, eða um 450 metra hæð, þegar hún sveif yfir Arn­ar­nes­inu í Kópavogi.