Ekki tókst að vísa egypsku Khedr-fjölskyldunni úr landi í morgun. Fjölskyldumeðlimir reyndust ekki vera á fyrirfram ákveðnum stað þegar stoðdeild ríkislögerglustjóra hugðist flytja þau úr landi. Í tilkynningu frá embætti ríkislögreglustjóra segir að ekki sé vitað um dvalarstað fjölskyldunnar en málið sé enn á borði stoðdeildar. Ekki verði veittar frekari upplýsingar um málið.

Til stóð að flytja fjölskylduna úr landi í morgun, með flugi Icelandair til Amsterdam. Sú flugvél fór í loftið klukkan 7:31 í morgun, án fjölskyldunnar. 

Lögmaður fjölskyldunnar, Magnús D. Norðdal, lýsti því í samtali við Stundina fyrr í morgun að hann hefði ekki náð sambandi við fjölskylduna í allan gærdag og ekki í morgun heldur. Sömu sögu hafði Sema Erla Serdar, formaður Solaris samtakanna, sem hefur barist fyrir því að fjölskyldan fái vernd hér á landi. 

Stundin óskaði upplýsinga frá ríkislögreglustjóra í morgun, símleiðis, um stöðu mála varðandi brottvikninguna. Upplýsingafulltrúi embættisins sagðist myndi hringja til baka með upplýsingar en það hefur enn ekki gerst. Embættið sendi hins vegar tilkynningu frá sér með ofangreindum upplýsingum og þar er tiltekið að ekki verði veittar frekari upplýsingar um málið að svo stöddu.