Áslaug Arna Sigurbjörnsdóttir dómsmálaráðherra segir það hafa verið mistök að þiggja flug með þyrlu Landhelgisgæslunnar á fund úr og aftur í hestaferð sem hún var í á Suðurlandi. Þetta kemur fram í frétt RÚV. 

Stundin greindi frá því í gær að þyrlan hefði flutt Áslaugu Örnu úr hestaferð sem hún var í með föður sínum á fundinn „Að lifa með veirunni“ í Reykjavík og til baka fimmtudaginn 20. ágúst. Ráðherra var ekki meðal ræðumanna á fundinum, en hlýddi á ræður og yfirgaf fundinn þegar hann var rétt um hálfnaður. Fundinum var streymt á netinu. Flogið var með hana til baka í hestaferðina og fór þyrlan þaðan í Borgarfjörð í næsta verkefni.

Sjaldgæft er að Landhelgisgæslan fljúgi með ráðherra og þegar það gerist tengist það oftast störfum stofnunarinnar eða utanríkismálum, svo sem heimsóknum erlendra ráðamanna eða varnaræfingum. Áslaug Arna og dómsmálaráðuneytið hafa ekki svarað fyrirspurn um málið sem Stundin sendi í gær.

„Forstjóri Landhelgisgæslunnar lagði þetta til og var vegna verkefnis á þessu svæði og fullvissaði mig um það að þetta hefði hvorki áhrif á verkefni eða flugáætlun og hefði engan aukakostnað eða fyrirhöfn í för með sér,“ sagði Áslaug Arna við RÚV. „En það er ljóst að þetta hefur tíðkast þegar það passar inn í verkefni Gæslunnar og það voru mistök af minni hálfu að samþykkja þetta boð.“

Aðspurð um hvort hún hefði skilning á gagnrýni vegna þessa sagði hún svo vera. „Já, ég skil það vel. Eftir á að hyggja hefði ég ekki átt að þiggja boðið en að sama skapi var ég fullviss um að þetta hefði engin áhrif á kostnað, verkefni, flugáætlun né fyrirhöfn Gæslunnar.“

Áslaug sagði jafnframt tilefni til þess að endurskoða verklag og að hún hyggðist ekki þiggja samskonar boð aftur. 

Spurningar Stundarinnar til ráðherra

1. Af hverju sótti ráðherra fundinn „Að lifa með veirunni“ fimmtudagsmorguninn 20. ágúst frekar en til dæmis að fylgjast með honum netleiðis?

2. Var eitthvað annað tilefni með ferð ráðherra til Reykjavíkur?

3. Óskaði ráðherra eftir fluginu sjálf?

4. Hvenær var tekin ákvörðun um að ráðherra færi á fundinn og hvenær var tekin ákvörðun um að ferðin yrði farin með þyrlunni?

5. Telur ráðherra það rétta nýtingu á tíma, mannauð og fjármunum Landhelgisgæslunnar að flytja ráðherra á þennan fund?

6. Telur ráðherra það rétta nýtingu á tíma, mannauð og fjármunum Landhelgisgæslunnar að flytja ráðherra í frí?