Tveimur starfsmönnun þingflokks Framsóknarflokksins var sagt upp störfum eftir að þingstörfum lauk 30. júní síðastliðinn. Eru uppsagnirnar sagðar hafa verið óvæntar og án aðdraganda. Þeir sem Stundin hefur rætt við telja að hugsanlegar formannskosningar í Framsókn séu ein ástæða uppsagnanna. Uppgefin ástæða er hins vegar sögð sú að stokka ætti upp í starfsmannamálum, meðal annars með því að ráða lögfræðing til starfa.
Uppsagnirnar koma þeim sem Stundin hefur rætt við á óvart, meðal annars í ljósi þess að framundan er kosningavetur á þingi, þó Alþingiskosningar verði ekki fyrr en haustið 2021. Í því ljósi vekur athygli að ráða eigi inn nýja starfsmenn, reynslulausa af störfum fyrir þingflokkinn. Eftir því sem næst verður komist var ekkert upp á störf starfsmannanna að klaga. Viðmælendur Stundarinnar nefna að annar starfsmannanna, Karítas Ríkharðsdóttir, hafi þótt gríðarlega vinnusöm og brunnið fyrir sínum störfum. Karítas og Þórunn Egilsdóttir, þingflokksformaður Framsóknarflokksins, hafi þá unnið náið saman.
Þingflokksformaðurinn vill ekki tjá sig um uppsagnirnar
Uppsagnirnar fóru fram með þeim hætti að Sigurður Ingi Jóhannsson, formaður Framsóknarflokksins, boðaði starfsmennina á fund 30. júní og tilkynnti þeim að krafta þeirra væri ekki óskað lengur. Voru nöfn þeirra tekin út af listum um starfsmenn þingflokka á vef Alþingis því sem næst strax og aðgangur þeirra að starfsstöðvum afturkallaður, nema í fylgd þingvarða, og þá til að sækja sína perónulegu muni. Ekki var óskað eftir vinnuframlagi þeirra á meðan að á uppsagnarfresti stæði.
„Þetta er bara málefni flokksins“
Athygli vekur að Sigurður Ingi skyldi segja starfsmönnunum upp, en ekki Þórunn Egilsdóttir þingflokksformaður, í ljósi þess að um starfsmenn þingflokksins var að ræða. Þórunn sagði í samtali við Stundina ekki ætla að tjá sig neitt um það hvort uppsagnirnar hefðu verið með vilja þingflokksins. „Þetta var bara eðlilegur gangur og hluti af breyttum áherslum,“ sagði Þórunn. Spurð hvort það hefði ekki verið eðlilegt að hún sem þingflokksformaður hefði staðið að uppsögnunum en ekki formaður flokksins sagði Þórunn: „Þetta er bara málefni flokksins“. Þegar bent var á að um hefði verið að ræða starfsmenn flokksins svaraði Þórunn: „Já já, það er alltaf flokkurinn sem kemur að svona.“ Engu að síður hafa heimildarmenn Stundarinnar lýst því að uppsögn Karítasar hafi ekki verið með vilja í það minnsta hluta þingmanna flokksins, þar á meðal Þórunnar.
Uppsagnirnar meðal annars sagðar tengjast valdabaráttu
Þrálátur orðrómur hefur verið um að til formannsslags í Framsóknarflokknum kunni að koma á næsta flokksþingi, og Lilja D. Alfreðsdóttir, varaformaður flokksins og mennta- og menningarmálaráðherra, skori Sigurð Inga á hólm. Þrátt fyrir að margt mæli gegn því að slíkt sé líklegt höfðu heimildarmenn Stundarinnar innan Framsóknarflokksins allir heyrt slíkan orðróm og útilokuðu ekki að Lilja myndi gefa kost á sér í formannsstólinn. Uppsögn starfsmannanna mætti því skoða í samhengi við það og Sigurður Ingi hefði hug á að í stöður starfsmanna þingflokksins yrði ráðið fólk sem honum væri hugnanlegt. Búið er að ganga frá ráðningu nýrra starfsmanna sem hefja eiga störf um næstu mánaðarmót en ekki er búið að gefa upp um hverja sé að ræða
„Það var fullkominn einhugur um það í þingflokknum“
Sigurður Ingi Jóhannsson, formaður Framsóknarflokksins, vísaði því á bug að uppsagnirnar tengdust valdabaráttu innan flokksins. Þær væru liður í endurskipulagningu af sama tagi og aðrir flokkar á Alþingi hefðu þegar ráðist í, með það að markmiði að auka við fagþekkingu starfsmanna flokksins. Hann lýsti jafnframt undrun yfir því að starfsmannamál flokksins gætu talist fréttaefni. „Ef þú vilt endilega fara að búa til frétt um þetta og hafa eitthvað eftir mér þá geturðu gert það. Það var fullkominn einhugur um það í þingflokknum og allir sammála um að það sé nauðsynlegt að auka faglega aðstoð og þess vegna erum við meðal annars að ráða okkur lögfræðimenntað fólk í þessi störf.“
Athugasemdir