Björgólfur Thor Björgólfsson fjárfestir lánaði móðurfélagi DV og fleiri fjölmiðla 920 milljónir króna á því tæplega þriggja ára tímabili sem félagið átti miðlana. Taprekstur DV var fjármagnaður með láninu.

Fjallað er ítarlega um fjármál, eignarhald og rekstrarumhverfi fjölmiðla í tölublaði Stundarinnar sem kom út í dag. Í nýjum ársreikningi fyrra móðurfélags DV, Dalsdals ehf., kemur fram að langtímaskuldir þess í árslok 2019 hafi verið 920 milljónir króna, sem allar eiga að greiðast til baka án vaxta og afborgana síðar en árið 2022. Samkeppniseftirlitið staðfesti í vor að helsti lánveitandi DV hefði verið Novator, félag Björgólfs Thor, sem veitti umrætt langtímalán.

Dalsdalur greiddi Frjálsri fjölmiðlun ehf., fyrirtækinu sem rak DV og ýmsa miðla, hluta upphæðarinnar sem hlutafé, en lánaði dótturfélaginu einnig háar summur. Skuld Frjálsrar fjölmiðlunar við Dalsdal stóð í 560 milljónum króna í árslok 2019.

Torg, sem er útgáfufélag Fréttablaðsins, keypti eignir Frjálsrar fjölmiðlunar í fyrra. Við samrunann, sem samþykktur var í mars á þessu ári, greindi Samkeppniseftirlitið frá því að Björgólfur Thor hefði verið fjárhagslegur bakhjarl DV undanfarin ár. Félag hans, Novator, var helsti lánveitandi DV frá árinu 2017 með umræddu langtímaláni og fjármagnaði þannig taprekstur fjölmiðilsins.

Novator sagði ósatt um málið um árabil. Ragnhildur Sverrisdóttir, talskona Björgólfs, neitaði því í svari til Stundarinnar í árslok 2017 að Björgólfur kæmi að fjármögnun DV og Frjálsrar fjölmiðlunar. Sigurður G. Guðjónsson, lögmaður og eigandi Dalsdals, neitaði að tjá sig um hver væri bakhjarlinn í samtali við Stundina árið 2018.

Lánið tengt deilum við Róbert Wessmann

Lánveitingar Novator má rekja til áralangra deilna Björgólfs Thors við fjárfestinn Róbert Wessmann. Með lánveitingunum til Frjálsrar fjölmiðlunar náði Björgólfur Thor yfirráðum yfir DV og tengdum miðlum og kom þannig í veg fyrir að Róbert gerði það. Róbert og samstarfsmenn hans hafa í staðinn lagt fé í fjölmiðlafyrirtækið Birtíng og einbeitt sér að rekstri þess. Þessi átök hafa verið til umfjöllunar í fjölmiðlum um árabil. Novator hefur ekki svarað spurningum um lánveitingarnar frá því að upplýst var um þær opinberlega.

Í ársreikningi Frjálsrar fjölmiðlunar kemur fram að tap félagsins á árinu 2019 hafi numið tæpum 318 milljónum króna. Eigið fé þess hafi verið neikvætt um tæpa 261 milljón króna, það er að skuldir félagsins hafi verið þeim mun hærri en eignir þess. Langstærstur hluti eigna félagsins voru óefnislegar, mestmegnis útgáfuréttindi, 307 af þeim 309 milljónum sem eignirnar eru metnar á.

„ekki komið fram vísbendingar [...] þess efnis að vafi kunni að leika á rekstrarhæfi félagsins“

Félagið er þó talið rekstrarhæft, þrátt fyrir að útgáfuréttindin hafi verið seld Torgi. „Ekki er hægt að sjá fyrir eða leggja mat á hver áhrif faraldursins muni verða á starfsemi félagsins en að mati stjórnar og framkvæmdastjóra hafa ekki komið fram vísbendingar við undirritun ársreikningsins þess efnis að vafi kunni að leika á rekstrarhæfi félagsins“, segir í skýrslu stjórnar.