Áhrifavaldur sem stóð fyrir hittingi vinkvenna sem styrktur var af Icelandair Hotels segir að hún hefði átt að hugsa betur veru Þórdísar Kolbrúnar Reykfjörð Gylfadóttur ráðherra á viðburðinum og myndum sem notaðar voru til kynningar fyrir tugþúsundir Instagram fylgjenda. Siðareglur ráðherra eru skýrar hvað varðar athæfi ráðherra sem vekur grunsemdir um að hann notfæri sér stöðu sína í eiginhagsmunaskyni.
Þórdís er ráðherra ferðamála, nýsköpunar og iðnaðar, og eru málefni Icelandair og ferðaþjónustunnar því mikið á hennar borðum um þessar mundir. Fjallað var um hitting vinkvennanna um helgina og gagnrýnt að tveggja metra reglunnar um sóttvarnir hafi ekki verið gætt í samsætinu samkvæmt myndum sem birtust á samfélagsmiðlum. Þórólfur Guðnason sóttvarnarlæknir var spurður um athæfið á upplýsingafundi í dag. „Ég held hún hafi ekki verið að brjóta lögin en hefði mátt passa betur upp á tveggja metra regluna þarna,“ sagði hann.
Þórdís hefur sagt að það hefði verið einfaldara að fara ekki í hittinginn og Bjarni Benediktsson, fjármálaráðherra og formaður Sjálfstæðisflokksins, sagði í dag við RÚV að athæfið hafi verið „óheppilegt og ráðherrann hafi gengist við því“.
Siðareglur ráðherra eru skýrar hvað varðar bæði atriðin - mögulega þátttöku ráðherra í kostun annars vegar og hunsun hennar á sóttvarnarreglum hins vegar. Hvað varðar kostunina og þátttöku ráðherra í auglýsingu vinkonu sinnar segir í 4. grein siðareglna: „Ráðherra forðast allt athæfi sem líklegt er til að vekja grunsemdir um að hann notfæri sér stöðu sína í eiginhagsmunaskyni.“
Í 3. grein er skýrar kveðið á um gjafir, hafi ráðherra þegið slíkar í hittingnum. „Ráðherra er ekki heimilt að hafa einkanot af gæðum starfsins nema að svo miklu leyti sem lög og reglur leyfa.“
Ráðherra hefur ekki svarað fyrirspurn Stundarinnar um málið.
Í auglýsingu heilbrigðisráðherra frá 30. júlí um takmörkun á samkomum vegna farsóttar er kveðið skýrt á um tveggja metra regluna. Reglurnar voru hertar vegna fjölgunar kórónaveirusmita. „Á samkomum, öllum vinnustöðum og í allri annarri starfsemi, m.a. þeirri sem talin er upp í 3. gr., skal tryggja að hægt sé að hafa a.m.k. 2 metra á milli einstaklinga sem ekki deila heimili.“
Í siðareglum ráðherra er kveðið á um háttsemi og framgöngu ráðherra í 4. grein: „Ráðherra gætir þess að rýra ekki virðingu embættis síns með ámælisverðri framkomu, skeytingarleysi um lög eða virðingarleysi við manngildi og mannréttindi.“
Hefði átt að hugsa betur veru Þórdísar í auglýsingaefni
Þórdís Kolbrún fór á laugardag ásamt vinkonum sínum í heilsulind á Hilton Nordica, sem er í eigu Icelandair Hotels. Eva Laufey Kjaran Hermannsdóttir, fjölmiðlakona, matarbloggari og áhrifavaldur, skipulagði fagnaðinn. Birti hún myndir af hittingnum á Instagram, þar sem hún er með nær 34 þúsund fylgjendur og var birtingin merkt sem samstarf við Icelandair Hotels.
„Ég sendi þeim reikning fyrir minni vinnu og fæ reikning á móti. Þetta er viðskiptadíll“
„Samstarfið fólst í því að ég og þrjár vinkonur mínar frá Akranesi fengu gistinguna,“ segir Eva Laufey. „Þetta voru reikningsviðskipti, eins og samstarf sem ég er með við Hagkaup og MS, nema í öðru formi. Ég sendi þeim reikning fyrir minni vinnu og fæ reikning á móti. Þetta er viðskiptadíll.“
Eva Laufey segir að eingöngu þær fjórar hafi notið samstarfsins fjárhagslega. „Þær sem að búa í Reykjavík komu með okkur og borguðu fyrir sig, fyrir spa og mat, og fóru svo heim til sín,“ segir hún.
Aðspurð hvort það sé ekki hjálplegt fyrir kynningarefnið að nafntoguð manneskja eins og ráðherra sé með á myndunum segir Eva að svo geti verið. „Jú, auðvitað er þetta kannski vandmeðfarið og ég hefði átt að hugsa þetta betur,“ segir hún. „Eðlilega hefði ég átt að hugsa út í það, en ég gerði það ekki. Því er verr og miður. En hún á sína reikninga fyrir þessu og ég mína, þannig að það ætti ekki að vera neitt vafamál.“
Fólk verði að bera ábyrgð á að halda regluna
Fréttablaðið fjallaði um málið í gær og benti á að sóttvarnaryfirvöld hefðu biðlað til landsmanna að gæta varúðar í samkvæmum þar sem áfengi er haft um hönd og að tveggja metra reglan hefði verið hunsuð í samkvæmi kvennanna eins og sjá megi á ljósmyndum úr því.
Brást Þórdís Kolbrún við með færslu á Facebook þar sem hún sagði að einfaldara hefði verið að vera ekki með vinkonunum. Passað hefði verið upp á reglur í hádegisverðinum þegar vinkonurnar sátu saman að borðum. „Starfsfólk var með grímur og tveggja metra regla tryggð gagnvart ótengdum aðilum á staðnum,“ skrifaði ráðherra. „Við fórum í verslanir sem eru opnar og gengum niður Laugaveginn eins og fleiri gerðu á góðviðris degi. Við borðuðum saman kvöldmat. Við fórum ekki út á lífið líkt og fullyrt hefur verið, það er rangt.“
„Það er náttúrulega á ábyrgð hvers einstaklings að halda þessa tveggja metra reglu eða ekki“
Sóttvarnarlæknir sagði á upplýsingafundinum í dag að passa hefði mátt betur upp á reglur í samsætinu en að lög hafi líklega ekki verið brotin. „Það er náttúrulega á ábyrgð hvers einstaklings að halda þessa tveggja metra reglu eða ekki,“ sagði hann. „Í þessu tilfelli án þess að ég geti nokkuð fjallað meira um það þá sýnir þetta bara að fólk verður að bera ábyrgð á sínum athöfnum. Tveggja metra reglan á náttúrulega kannski fyrst og fremst, eða aðallega, við um umgengni við einstaklinga sem maður þekki engin deili á.“
Leiðrétting: Í fréttinni stóð upphaflega að konurnar hefðu snætt hádegisverð á veitingastaðnum Vox, sem er í eigu Icelandair Hotels eins og heilsulindin á Hilton Nordica. Í Facebook færslu leiðrétti Eva Laufey þetta. „Við snæddum á veitingastaðnum KOL í hádeginu, þar var þessi frægi bröns. Þar greiddi hver og ein fyrir sig og var á engan hátt tengdur samstarfi.“
Covid-19
Fleiri smitast af hinni banvænu Nipah-veiru
Heilbrigðisyfirvöld grípa til sóttkvíar eftir Nipah-smittilfelli á Indlandi
Veira dreifist hratt um Evrópu
Sérfræðingar vara við nýjum heimsfaraldri
Suður-Súdan glímir við versta kólerufaraldurinn í 20 ár
Athugasemdir