Skatta­yf­ir­völd á Spáni rann­saka nú sölu fjár­fest­is­ins Haraldar Jóns­sonar á Afr­íku­út­gerð Sjóla­skipa, sem stað­sett var á Kanarí­eyjum, til Samherja árið 2007. Þetta er gert að beiðni íslenska yfir­valda. Frétt um málið var birt í spænskum fjöl­miðli fyrir nokkrum dögum.

Haraldur Jónsson, og systk­ini hans þrjú sem kennd eru við útgerð­ina Sjóla­skip, ráku útgerð­ina á Kanarí­eyjum, sem veiddi aðal­lega hesta­makríl í Marokkó og Márit­aníu, um ára­bil en seldu hana svo til akur­eyska útgerð­ar­fé­lags­ins.

Samherji rak útgerð­ina til árs­ins 2013 þegar félagið seldi hana til rúss­neska útgerð­ar­manns­ins Vitaly Orlovs. 

Ákært fyrir 4.4 milljarða skattalagabrot

Haraldur og systk­ini hans, Guð­mundur, Berglind og Ragn­heiður Jóna, voru í fyrra ákærð fyrir skatt­svik af emb­ætti hér­aðs­sókn­ara í Reykja­vík.

Ákær­urnar byggja meðal ann­ars á ráð­stöfun sölu­hagn­aðar þeirra af útgerð­inni á Kanarí­eyjum árið 2007. Systk­inin fjögur voru ákærð hvert í sínu lagi og svo voru Haraldur og Guð­mundur einnig ákærðir. Van­fram­taldar tekjur voru 4.4 millj­arðar króna, sam­kvæmt ákær­unum, og van­greiddur skattur systk­in­anna nemur í heild sinni millj­arði króna. Hin meintu brot áttu sér stað á árunum 2005 til 2009.

Um er að ræða eitt stærsta mál sinnar teg­undar hér á landi. 

Systk­inin reyna nú að fá mál­inu vísað frá dómi á grund­velli þess að mál þeirra hafi nú þegar fengið sína með­ferð hjá skatta­yf­ir­völdum og að ekki sé hægt að refsa fólki tvisvar sinnum fyrir sama brotið. 

Tengist viðskiptum upp á 12 milljarða

Í frétt spænska fjöl­mið­il­is­ins er ekki farið náið út í hvað spænsk skatta­yf­ir­völd eru að rann­saka nákvæm­lega eða hvernig rann­sókn­inni miðar. Í frétt spænska mið­ils­ins er sagt að um sé að ræða rann­sókn á sölu útgerðar á Kanarí­eyjum fyrir 75 millj­ónir evra eða 12 millj­arða króna. Um er að ræða sölu systk­in­anna á útgerð­inni til Samherja á sínum tíma. Líkast til snýst rann­sóknin á Spáni um það hvort ein­hver mögu­leg skattaund­an­skot hafi átt sér þar í landi í tengslum við við­skiptin. 

„Ég hef ekk­ert við þig að tala í fjöl­miðlum. Takk fyrir. Bless­aður.“ 

Eins og Frétta­tím­inn greindi frá fyrir nokkrum árum, í sam­vinnu við Reykja­vík Media, komu nöfn systk­in­anna fjög­urra fyrir í Panama­skjöl­unum. Í Panama­skjöl­unum kom fram að systk­inin not­uðu félög í skatta­skjól­inu Tortólu til að halda utan um eign­ar­hald á þremur félögum á Kýpur, Kenora Shipping, Seadove Shipping og Fishing Company Beta, sem svo áttu útgerð­ina á Kanarí­eyjum. 

Í til­felli systr­anna Berg­lindar og Ragn­heiðar Jónu var að finna ítar­legar upp­lýs­ingar um það í Panama­skjöl­unum hvernig Tortólu­fé­lög þeirra, Aurora Continental Limited og Stenton Consulting S.A., seldu eign­ar­hluti sína í Afr­íku­út­gerð­inni. 

Eitt helsta inn­takið í mál­unum gegn systkin­unum snýr að því að þau hafi ekki talið fram tekjur þess­ara félaga með rétt­mætum hætti á þessum tíma. Í ákærum á málum þeirra kom fram það mat að þessi félög þeirra erlendis hefðu átt að greiða skatt á Íslandi. 

Systk­inin hafa í gegnum árin ekki viljað ræða um við­skipti sín við fjöl­miðla þegar eftir því hefur verið leitað. „Ég hef ekk­ert við þig að tala í fjöl­miðlum. Takk fyrir. Bless­aður,“ sagði Ragn­heiður Jóns­dóttir við Frétta­tím­ann á sínum tíma. Guð­mundur Jónsson vildi heldur ekki ræða um málið.  

Syst­urnar í Sjóla­skipum fluttu millj­arða­eignir sínar í Tortólu­fé­lög­unum til Lúx­em­borgar á sínum tíma eins og Stundin hefur sagt frá. 

Haraldur enn í útgerð

Í frétt spænska fjöl­mið­ils­ins er aðkoma spænskra yfir­valda að rann­sókn­inni sett í sam­hengi við að Haraldur Jónsson stundar enn veiðar í Afríku í gegnum Kanarí­eyjar. Frá árinu 2010 hefur hann rekið útgerð­ina Úthafs­skip þaðan. Sú útgerð gerir út tvo tog­ara sem veitt hafa hesta­makríl við strendur Vestur-Afríku.

Í frétt­inni kemur einnig fram að Haraldur Reynir hafi síð­ast­liðin ár reynt að fá leyfi til að stunda fisk­veiðar í súlt­anat­inu Óman á vest­ur­hluta Arab­íu­skag­ans.