Hannes Hólmsteinn Gissurarson, prófessor í stjórnmálafræði við Háskóla Íslands, furðar sig á því að Hildur Lilliendahl Viggósdóttir hafi ekki verið rekin úr starfi sínu sem verkefnastjóri fyrir Reykjavíkurborg. Þetta kemur fram í færslu á Facebook síðu hans á föstudag, en Hildur er nemandi við deildina sem Hannes starfar við.
„Ég veit, að ég er heimskur og fáfróður,“ skrifar Hannes. „En getur einhver skýrt út fyrir mér, svo að ég skilji, hvers vegna Kristinn Sigurjónsson var rekinn frá Háskólanum í Reykjavík, en Hildur Lilliendahl Viggósdóttir starfar enn hjá Reykjavíkurborg?“
Í færslu sinni rifjar Hannes upp að Hildur hafi orðið uppvís af grófum ummælum á netinu árið 2014. Hún og eiginmaður hennar báðust afsökunar opinberlega á ummælunum.
Leggur Hannes mál Hildar til jafns við uppsögn Kristins Sigurjónssonar frá Háskólanum í Reykjavík í kjölfar ummæla á Facebook, þar sem hann kvaðst ekki vilja vinna með konum. Kristinn kærði Háskólann í Reykjavík fyrir aðför að málfrelsi sínu, en Héraðsdómur komst að þeirri niðurstöðu að uppsögn hans hefði verið nauðsynleg til þess að framfylgja jafnréttisstefnu skólans og vernda hlut kvenkyns nemenda og samstarfsfólks.
Hildur brást við ummælum Hannesar á Twitter. „Jæja. Þetta kom mjög out of nowhere. Ég er nemandi við stjórnmálafræðideild HÍ. Hvað geri ég í þessu?“
Hildur veltir því þannig fyrir sér á Twitter hvað hún eigi að gera sem nemandi við deildina sem Hannes gegnir stöðu prófessors við. Í athugasemdum hvetja aðrir notendur miðilsins hana til þess að leita til skólayfirvalda eða kæra ummæli hans til siðanefndar, en hann hefur áður gerst brotlegur gegn siðareglum samkvæmt úrskurði nefndarinnar.
Athugasemdir