Fimmtánda spurningaþrautin: Tíu spurningar og svörin eru hér fyrir neðan mynd úr þekktri teiknimynd.

Aukaspurningar tvær:

Hver er karlmaðurinn á myndinni að ofan?

Og úr hvaða kvikmynd er myndin hér að neðan?

Hér eru svo aðalspurningarnar tíu:

1.   Kínverji nokkur, fæddur árið 551 fyrir Krist, heitir 孔子, sem hljóðritað á latneskt letur er skrifað Kǒng Qiū. Þessi spekingur er þó kunnari undir öðru nafni hér á Vesturlöndum. Hvað er það?

2.   Hvað heitir trommuleikarinn í The Rolling Stones?

3.   Hvað heitir hálsinn milli Eyjafjallajökuls og Mýrdalsjökuls?

4.  Árið 1805 stýrði Nelson flotaforingi breska flotanum til sigurs gegn Frökkum og Spánverjum, en sjálfur féll hann um borð í skipi sínu á sigurstundu. Skipið er enn varðveitt í höfninni í Portsmouth og var vinsæll áfangastaður ferðamanna, meðan þeir voru enn og hétu. Hvað heitir þetta skip?

5.   Árið 1980 kom út myndskreytt barnabók eftir nýjan höfund, bókin hét „Allt í plati“. Höfundurinn hefur síðan gefið út eina til þrjár bækur á hverju ári, flestar ríkulega myndskreyttar, en einna síðastar eru þrjár spennandi bækur sem gerast á Skuggaskeri. Hvað heitir þessi höfundur?

6.  Hvað heitir höfuðborgin í Tékklandi?

7.   Fyrir hverja situr Björn Leví Gunnarsson á þingi?

8.   Hver samdi þekktasta lagið sem sungið er við Maístjörnu Halldórs Laxness?

9.  Hvaða tónlistarmaður er þekktastur fyrir lagið „Bad Guy“?

10.  Hæsta tré á Íslandi nálgast óðum 30 metra hæð. Af hvaða trjátegund er það?

Þá eru þau hér þau hin tíu svör:

1.   Konfúsíus.

2.   Charlie Watts.

3.   Fimmvörðuháls.

4.   Victory.

5.   Sigrún Eldjárn.

6.   Prag.

7.   Pírata.

8.   Jón Ásgeirsson.

9.   Billie Eilish.

10.  Sitkagreni.

Aukaspurningarnar:

Karlinn er vitasuld Garry Kasparov, fyrrverandi heimsmeistari í skák.

Teiknimyndin er „The Jungle Book“ eða „Skógarlíf“ frá 1967. Ef einhver segir „Móglí“ má líka gefa rétt fyrir það.

Næstu spurningaþraut á undan er svo einmitt hérna að finna.

En þá sextándu hérna.