Tólfta spurningaþrautin er eins og alltaf, tíu spurningar og svörin eru svo hér fyrir neðan ljósmynd af frægu kennileiti.
Aukaspurningar eru svo tvær að venju:
Hvaða snotra dýr er á myndinni hér að ofan?
Í hvaða borg er þetta kennileiti?
En hér eru spurningarnar tíu:
1. Hvað heitir yngsti sonur Donalds Trumps?
2. Hvað heitir spákonan í Eyjabókum Einars Kárasonar?
3. Bandarískur tónlistarmaður sem settist að á Íslandi gaf út lagið The Greatest Motherfucker sem opinberlega hét þó víst bara GMF. En hvað heitir tónlistarmaðurinn?
4. Í Evrópu sitja kóngar nú í hásæti í Belgíu, Hollandi, Noregi, Svíþjóð og á Spáni. Svo ber reyndar einn evrópskur þjóðhöfðingi líka titilinn „kóngur“ í sínu ríki, þótt sá titill sé mjög lítið notaður og flestir þekkja þennan þjóðhöfðingja undir allt öðrum embættistitli. Hver er þessi „kóngur“?
5. Mjaldur er meðalstór tannhvalur sem vekur ævinlega athygli fyrir sinn hvíta lit. Hann á náfrænda í hópi tannhvala sem þykir jafnvel enn sérkennilegri í útliti. Hvaða hvalur er það?
6. Hver var ráðinn nýr útvarpsstjóri um daginn?
7. Hvaða myndlistarkona málaði vissulega margt og mikið um ævina en er þó allra þekktust fyrir öflugar sjálfsmyndir sínar?
8. Hvað heitir reikistjarnan sem næst er sólinni okkar?
9. Með hvaða körfuboltaliði spilaði Michael Jordan lengst af?
10. Hvaða fyrirtæki stofnaði Pálmi Jónsson árið 1959?
Þá eru hér þau hin tíu svör:
1. Barron.
2. Karólína.
3. John Grant.
4. Páfinn í Róm. Hann ber hinn formlega titil „Konungur hins kirkjulega ríkis“ auk þess að vera „biskup yfir Róm“.
5. Náhvalur með sína einu löngu tönn langt fram úr skoltinum.
6. Stefán Eiríksson.
7. Hin mexíkóska Frida Kahlo.
8. Merkúr.
9. Chicago Bulls.
10. Hagkaup.
Aukaspurningarnar:
Dýrið er vitanlega tapír.
Og Brandenborgarhliðið er í Berlín.
Næstu spurningaþraut á undan er svo hérna að finna.
Næsta þraut á eftir, sú 13., hún er hins vegar hér.
Athugasemdir