Þrettánda spurningaþrautin er eins og hinar tólf: tíu spurningar og svörin má finna hér fyrir neðan ljósmynd af valdakonu einni.

Aukaspurningar eru svo tvær að venju:

Hver er sá tvíliti fáni sem blaktir hér að ofan?

Og hver er konan með klútinn litríka?

En hér eru spurningarnar tíu:

1.  Baltasar Kormákur hefur vakið athygli fyrir að halda áfram af fullum krafti - en þó með tilhlýðilegri varúð - að taka upp sjónvarpsseríu fyrir Netflix. Hvað heitir sú sería?

2.   Milli hvaða landa liggur Brenner-skarð?

3.  Listgáfa leggst stundum í ættir, virðist vera. Heimsþekkt tónskáld eignaðist fjölda barna og þar á meðal voru fjórir synir sem urðu líka tónskáld, og bara ansi góð. Hvað hét tónskáldið sem gat af sér hin fjögur?

4.  Hvert er nafn keisarans vonda í Star Wars kvikmyndunum?

5.   Hvað þýðir skammstöfunin BSRB?

6.  Hver skrifaði ævisögu Steingríms Hermannssonar, formanns Framsóknarflokksins, í þremur bindum?

7.   Hvað eiga íslensku rithöfundarnir Ólafur Jóhann Sigurðsson, Snorri Hjartarson, Thor Vilhjálmsson, Fríða Á. Sigurðardóttir, Einar Már Guðmundsson, Sjón, Gyrðir Elíasson og nú síðast Auður Ava Ólafsdóttir sameiginlegt? (Auðvitað er það sitt af hverju. En ef þið vitið þetta, þá vitiði þetta.)

8. Í síðari heimsstyrjöldinni settust Þjóðverjar um borgina Leníngrad í Rússlandi 8. september 1941. Hversu lengi stóð umsátrið í dögum talið? Skekkjumörk eru 50 dagar til eða frá.

9.   Í hvaða heimsálfu er dýrategundin alpaca upprunnin?

10.  Farþegaskipið Titanic var alls ekki einstakt í sinni röð. Það átti tvö systurskip, jafn stór og glæsileg. Nefnið að minnsta kosti annað þeirra.

Þá eru þau hér þau hin tíu svör:

1.   Katla.

2.  Austurríki og Ítalíu.

3.  Johann Sebastian Bach.

4.   Palpatine.

5.  Bandalag starfsmanna ríkis og bæja.

6.  Dagur B. Eggertsson.

7.  Þau hafa, ein íslenskra höfunda, unnið bókmenntaverðlaun Norðurlandaráðs.

8.  Í 872 daga. Rétt telst því allt frá 822 til 922.

9.  Suður-Ameríku. Alpaca er náskylt llamadýrinu.

10.  Britannic og Olympic.

Aukaspurningarnar:

Fáninn er að sjálfsögðu sá pólski.

Og konan er Helle Thorning-Schmidt forsætisráðherra Danmerkur 2011-2015.

Næsta spurningaþraut á undan, sú tólfta, hún er svo hérna.

En hér birtist svo sú næsta á eftir.