Rósa Björk Brynjólfsdóttir, þingkona Vinstri grænna, styður ekki frumvarp Áslaugar Örnu Sigurbjörnsdóttur dómsmálaráðherra um breytingar á lögum um útlendinga. Frumvarpið, segir Rósa, festir í sessi Dyflinar-reglugerðina og veldur því að ekki er hægt að taka til efnismeðferðar jaðarmál. Því væri ekki hægt að taka til meðferðar beiðnir fjölskyldna um vernd þar sem til að mynda börn með lífhótandi sjúkdóma væru meðal fjölskyldumeðlima eða ef um væri að ræða þungaðar konur sem væru komnar nánast að fæðingu. Þeim yrði sjálfvirkt vísað úr landi verði frumvarpið að lögum. Dómsmálaráðherra segir stefnu stjórnvalda mannúðlega.

Framhald fyrstu umræðu um frumvarpið fór fram í gærkvöldi á Alþingi og gagnrýndi Rósa Björk frumvarpið harðlega. Sagði hún frumvarpið valda því að endursendingar ákveðinna hópa sem hingað kæmu og óskuðu eftir vernd yrðu því sem næst sjálfvirkar. Þá væri komið í veg fyrir að hægt væri að taka svokölluð jaðarmál til efnismeðferðar hér á landi. „Til dæmis ef hingað kemur fjölskylda með vernd í Grikklandi og barn með alvarlegan hjartagalla, þá er ekki heimilt samkvæmt þessu frumvarpi að taka slík mál til efnismeðferðar. Jafnvel þó að fjölskylda sem til okkar leitar með verndarstöðu er með barn sem þarfnast læknisaðstoðar eða ef kona er ólétt og nánast komin að fæðingu eða börn í viðkvæmri stöðu eða hefur fest rætur í íslenska skólakerfinu.“

Finnst framgangan dapurleg á tímum Covid-19

Rósa sagði enn fremur að ef frumvarpið yrði að lögum myndi það gera að verkum að stjórnvöld gætu vísað fólki aftur til Grikklands, Ungverjalands og Búlgaríu. Allt eru það lönd sem hafa verið gagnrýnd harðlega fyrir slæman aðbúnað flóttafólks.

„Sérstaklega dapurlegt að verða vitni að því að íslensk stjórnvöld séu á tímum Covid-19 að reyna að leita allra leiða til að synja fólki“

Rósa Björk er varaformaður flóttmannanendar Evrópuráðsþingsins og sagði hún að í því ljósi væri „alveg sérstaklega dapurlegt að verða vitni að því að íslensk stjórnvöld séu á tímum Covid-19 að reyna að leita allra leiða til að synja fólki um umsóknir um alþjóðlega vernd hér á landi og snúa þeim hreinlega til baka.“

Ráðherra segir Ísland standa sig vel

Áslaug Arna svaraði því til að enn myndi fólk sem hingað kæmi til lands, og hefði fengið vernd annars staðar, fá einstaklingsbundna skoðun og það yrði metið hvort endursending þess myndi brjóta í bága við útlendingalög og mannréttindasáttmála Evrópu. Þá sagði ráðherrann einnig að þrátt fyrir að frumvarpið yrði að lögum yrði áfram staðið við þá ákvörðun að senda fólk ekki til baka til landa eins og Grikklands eða Ungverjalands, það myndi ekki breytast.

„Varðandi stefnu okkar þá er hún mannúðleg, við erum að veita fólki sem er í þörf fyrir vernd alþjóðlega vernd og við erum talin standa okkur vel í þeim efnum þegar litið er til landa í kringum okkur,“ sagði Áslaug Arna.