Áttunda spurningaþrautin er sams konar og hingað til, tíu spurningar og svörin eru hér fyrir neðan myndina af karli einum ungum.
Aukaspurningar eru svo tvær að venju: Úr hvaða kvikmynd er myndin að ofan og hver er svo ungi karlinn hér að neðan?
1. Hvað heitir utanríkisráðherra Bandaríkjanna?
2. Stöðuvatn nokkurt var til skamms tíma hið fjórða stærsta í veröldinni en á síðustu áratugum hefur það nálega horfið, eftir að ánum, sem í það féllu, var í stórum stíl veitt í áveitur. Hvaða vatn er þetta - eða var?
3. Hvaða efnilegi fótboltakappi þurfti um 12 ára aldur að leggja land undir fót og fara til liðs í öðru landi, af því liðin í heimalandi hans höfðu ekki efni á að borga rándýra hormónameðferð, sem hann þurfti á að halda til að stækka eðlilega?
4. Aðeins ein kona hefur verið forsætisráðherra Ísraels og það er langt síðan. Hvað hét hún?
5. Í hvaða landi er hinn víðfrægi Coronabjór upprunninn?
6. „Hvað dvelur Orminn langa?“ spyrja menn stundum þegar þá er farið að lengja eftir einhverju. Hver var þessi ormur?
7. Hver er nýr ríkislögreglustjóri?
8. Ráðherra í ríkisstjórn Íslands vann einu sinni bæði fyrstu og önnur verðlaun í samkeppni um örsögur sem félag nokkurt hélt. Hver var þessi sigursæli ráðherra (sem var reyndar ekki í embætti þá stundina)?
9. „Megas“ hét fyrsta plata Megasar. Hvað hét sú næsta?
10. Tjeljabinsk heitir borg ein í Rússlandi á mótum Mið-Asíu og Síberíu. Þann 15. febrúar 2013 gerðist í nágrenni borgarinnar atburður sem vakti heimsathygli og jafnvel nokkurn ugg. Hver var hann?
Þá koma hér svörin:
1. Mike Pompeo - síðara nafnið dugar
2. Aral-vatn
3. Lionel Messi
4. Golda Meir
5. Mexíkó
6. Herskip, langskip, víkingaskip - skip Ólafs Tryggvasonar Noregskonungs, óvinir hans biðu þess að það birtist svo þeir gætu ráðist til atlögu, en „skip“ nægir alveg sem rétt svar
7. Sigríður Björk Guðjónsdóttir
8. Katrín Jakobsdóttir - félagið var Mímir, félag íslenskufræðinema við Háskóla Íslands
9. Millilending
10. Stór loftsteinn sprakk í 30 kílómetra hæð yfir borginni
Aukaspurningarnar: Kvikmyndin er „Doctor Strangelove, or How I Learned to Stop Worrying and Love the Bomb“ en karlinn er Nelson Mandela, síðar forseti Suður-Afríku.
Næsta spurningaþraut á undan er hérna. Sú næsta er hins vegar hér.
Þá er hér að gamni mynd af sprengingunni í Tjeljabinsk.
Athugasemdir