Stundin mun á næstu vikum senda út menningarviðburði í samstarfi við Menningarhúsin í Kópavogi. Viðburðirnir verða haldnir klukkan 13 á mánudögum, miðvikudögum og föstudögum á meðan samkomubanni stendur vegna COVID-19 heimsfaraldursins. Hægt verður að sjá viðburðina á forsíðu Stundarinnar, á Facebook-síðu Stundarinnar og Facebook-síðu Menningarhúsanna í Kópavogi.

Meðal þeirra sem koma fram í viðburðaröðinni eru Sævar Helgi Bragason stjörnufræðingur, Gerður Kristný skáld,  Jógvan, Matti Matt, Vignir Snær, Ragna Fróðadóttir, Andri Snær Magnason rithöfundur, Sigurbjörn Bernharðsson, Halla Oddný, Þorgrímur Þráinsson, Elín Björk Jónasdóttir, Einar Falur, Kordo kvartettinn og Hrönn Egilsdóttir.

Í dag fjallar Þorgrímur Þráinsson um mikilvægi lesturs, hreyfingar, svefns og mataræðis. Útsendingin hefst klukkan 13. Streymi af viðburðinum verður birt í þessari frétt og á fyrrgreindum Facebook-síðum ásamt forsíðu Stundarinnar. Þá verður upptaka tiltæk á sömu stöðum í kjölfarið.

Eftirfarandi er tilkynning frá menningarhúsunum í Kópavogi um viðburðinn:

Kúltúr klukkan 13 | Þorgrímur Þráinsson

Þorgrímur Þráinsson ræðir um læsi í Kúltúr klukkan 13 miðvikudaginn 8. apríl. Læsi er eitt mikilvægasta lýðheilsumál þjóðarinnar. Ef börn ná tökum á læsi, eflist sjálfsmynd þeirra, árangur í skóla batnar og börnin ná tökum á sjálfum sér. Ein mikilvægasta glíma lífsins er glíman við mann sjálfan og reglulega stöndum við frammi fyrir mikilvægum áskorunum. 

Þorgrímur Þráins fjallar um mikilvægi lesturs, hreyfingar, svefns og mataræðis. Hann er sjálfur þriggja barna faðir og segist hafa gert fjölda mistaka í uppeldismálum. Og lært af þeim. 

Þorgrímur Þráinsson var fyrrum landsliðsmaður í fótbolta og hefur starfað með liðinu síðastliðin 13 ár. Þá hefur hann verið tengdur forvarnastarfi í liðlega 30 ár og síðastliðin 12 ár hefur hann heimsótt alla skóla á landinu, árlega, og flutt fyrirlesturinn; Verum ástfangin af lífinu fyrir nemendur í 10. bekk. Að auki hefur hann skrifað 38 bækur, flestar fyrir börn og ungmenni.