Stuðningsmenn Guðmundar Franklíns Jónssonar safna nú meðmælum fyrir framboð hans til forseta, að því fram kemur á vefsíðu með titlinum „Guðmundur Franklín Jónsson á Bessastaði 2020“.
„Ég hef ekki tilkynnt opinberlega um framboð til forseta Íslands og ef ég geri það, verður það ekki strax, en veiran setur strik í reikninginn og kosningunum verður kannski frestað,“ segir Guðmundur Franklín í svari við fyrirspurn Stundarinnar. „Fólk er að skora á mig og hefur gert alveg frá áramótum. Ef ég býð mig fram fer það ekki fram hjá neinum, en það kemur í ljós á næstu vikum. Veiran ræður för og ég hlýði Víði.“
Forsetakosningar fara fram laugardaginn 27. júní 2020. Guðni Th. Jóhannesson tilkynnti í nýársávarpi sínu að hann gæfi kost á sér til endurkjörs. Fram að þessu hefur enginn tilkynnt um mótframboð, en samkvæmt lögum falla kosningarnar niður ef aðeins ein kjörgeng manneskja er í framboði.
Meðmælasöfnun á netinu hefur verið send á fólk, þar sem það er hvatt til að styðja Guðmund Franklín til framboðs. „Félagi minn Guðmundur Franklín Jónsson ætlar að skora Guðna Th. á hólm í næstu forsetakosningum og er að safna meðmælendum,“ segir á vefsíðunni. „Ég ætla að gerast svo frakkur og biðja þig um hvort ég mætti senda þér meðmælendalista til undirskriftar, eingöngu fyrir þig og þína og náttúrulega vini þína. Það þarf að safna allt að 3000 meðmælendum en safnast er saman kemur. Ef þú ert til í að leggja honum lið, þá þyrfti ég eingöngu að fá heimilisfangið þitt, svo ég geti póstlagt einn meðmælenda-lista til þín. FRAM TIL SIGURS 27. JÚNÍ 2020.“
Guðmundur Franklín tilkynnti einnig um framboð til forseta í síðustu kosningum árið 2016. Nú í janúar hvöttu tveir Facebook vinir hann til að fara aftur í forsetaframboð. „Takk fyrir áskorunina, ég er að sjálfsögðu að hugsa málið,“ svaraði hann. „Það er ekki hægt þjóðfélagslega séð að hafa Guðna önnur fjögur ár í viðbót. Hann er þegar búinn að skaða þjóðfélagið eins og í Orkupakkamálinu. Hann má ekki geta skaðað Ísland oftar, þessu verður að linna, sérstaklega með lifandi aðildarumsókn ESB sem er enn í vinnslu. Ef að enginn góður gefur sig fram á næstu tveimur mánuðum þá kem ég til með að hugsa þetta grafalvarlega. Því skal ég lofa þér.“
„Það er ekki hægt þjóðfélagslega séð að hafa Guðna önnur fjögur ár í viðbót“
Guðmundur Franklín er með BSc próf í viðskipta- og hagfræði og meistarapróf í alþjóðastjórnmálum og hagfræði. Hann starfaði í 13 ár sem verðbréfamiðlari á Wall Street hjá fyrirtækjunum Bersec International, Oppenheimer & Co. og Burnham Securities. Hann hefur starfað sem hótelstjóri á Hotel Klippen í Gudhjem á Borgundarhólmi í Danmörku frá árinu 2013.
Guðmundur Franklín stofnaði stjórnmálaflokkinn Hægri grænir árið 2010, en hann rann inn í þjóðernisflokkinn Íslensku þjóðfylkinguna árið 2016. Var Guðmundur Franklín þá hættur sem formaður. Vorið 2016 bauð hann sig fram til forseta Íslands, en dró það til baka þegar Ólafur Ragnar Grímsson, sitjandi forseti, tilkynnti óvænt um að hann yrði aftur í framboði sem hann svo síðar hætti við. Lýsti Guðmundur Franklín yfir stuðningi við hann, en hafði ekki skilað meðmælalistum á þeim tímapunkti.
Um haustið 2016 sóttist hann svo eftir sæti á lista Sjálfstæðisflokksins í prófkjöri flokksins í Reykjavík fyrir Alþingiskosningar. Nýverið hefur hann tekið þátt í starfi Orkunnar okkar, sem beitti sér gegn innleiðingu Þriðja orkupakkans, og skrifað fjölda greina um þjóðmál.
Athugasemdir