Stuðningur við Donald Trump Bandaríkjaforseta hefur stóraukist síðustu daga og hefur hann ekki notið meira trausts frá því skömmu eftir að hann tók við embættinu.
Donald Trump tók við sem Bandaríkjaforseti 23. janúar 2017. Innan þriggja vikna frá embættistökunni var meirihluti landsmanna andvígur honum og hefur stuðningur við hann mælst með allra minnsta móti miðað við aðra forseta.
Samkvæmt nýjustu tölum, sem sýna veginn stuðning við forsetann út úr öllum könnunum, er stuðningur við Trump nú í fyrsta sinn orðinn jafnmikill og í janúar 2017. Nú hefur einnig andstæðingum forsetans fækkað og eru þeir í fyrsta sinn frá mars 2017 orðnir minna en helmingur landsmanna.
Trump er nú vinsælli en George Bush eldri var á sama tíma í forsetatíð hans, sem og Jimmy Carter árið 1980. Stuðningur við Trump er aðeins rúmum tveimur prósentustigum minni en stuðningur við Barack Obama á sama tíma forsetatíðar.
Ánægja með viðbrögð við veirunni
Um 60 prósent Bandaríkjamanna segjast sátt við viðbrögð Trumps vegna COVID-19 faraldursins, samkvæmt könnun Gallups. Á sama tíma hafa Bandaríkin nú orðið það land sem er með flest tilfelli COVID-19 í heiminum. Í gær bættust 17 þúsund tilfelli við í Bandaríkjunum, en næst flest viðbætt tilfelli voru rúm átta þúsund á Spáni. Þannig fjölgaði tilfellum í Bandaríkjunum um 25 prósent á einum degi.
Upphaflega gerði Trump lítið úr hættunni, sagði fréttamiðla ýkja veiruna og kallaði faraldurinn „svikamyllu Demókrata“. Frá því hann breytti skilaboðum sínum 11. mars hefur stuðningur við hann aukist hratt.
Samkvæmt nýrri könnun hafa 9 af hverjum 10 Bandaríkjamönnum áhyggjur af kórónaveirunni, sem er mikil breyting frá því áður, þegar Repúblikanar höfðu mun minni áhyggjur af veirunni en Demókratar.
Aukinn stuðningur í krísu
Talið er að Trump njóti nú þess að í krísuástandi, sérstaklega þegar hægt er að greina utanaðkomandi ógn, eykst stuðningur við stjórnvöld. Áhrifin eru kölluð Fánaáhrifin, eða Rally 'round the flag effect. Eitt af lykilatriðum í auknum stuðningi við stjórnmálamann er að hann sé áberandi í viðbrögðum við krísunni.
Þannig fór George W. Bush Bandaríkjaforseti úr því að njóta stuðnings 39 prósent kjósenda í 90 prósent stuðning beint í kjölfar hryðjuverkaárásanna á Bandaríkin 11. september 2001. Eftir að stuðningur við hann þvarr tók hann ákvörðun um að ráðast inn í Írak í mars 2003. Um leið jókst stuðningur við hann úr 57 prósent í 71 prósent.
Faðir George W. Bush, George Bush eldri, jók stuðning við sig um 16 prósentustig frá júlí til ágúst 1990, eða úr 60% í 76%, á milli þess sem hann hóf innrás í Írak í Persaflóastríðinu. Stuðningur við Bush eldri náði síðan hámarki í 89% í mars 1991, en átti eftir að falla niður í 29% vegna lélegs efnahags.
Trump hefur greint frá því að hann líti á sig sem „stríðsforseta“ og hefur hann lagt sig fram um að stýra blaðamannafundum um áhrif veirunnar sjálfur, þrátt fyrir gagnrýni á ítrekaðar rangfærslur hans um veiruna. Þá hefur hann lagt áherslu á að um sé að ræða „kínverska“ og „útlenska“ veiru og ríkisstjórn hans barist fyrir því að nota heitið „Wuhan-vírus“ í yfirlýsingu G-7 ríkjanna.
New York Times hefur eftir Alec Tyson, rannsakanda hjá Pew Research Center, að ólíklegt sé að margir breyti skoðun sinni á Trump. „Fólk hafði skoðun á forsetanum mjög snemma í stjórnartíð hans og það voru mjög fastheldnar skoðanir. Það er ólíklegt að fólk sé að þróa með sér skoðun á Trump núna.“
Á Íslandi hefur stuðningur við ríkisstjórnina aukist um 14 prósentustig, samkvæmt nýjustu könnun MMR, eftir að áhrifa kórónaveirunnar fór að gæta.
Athugasemdir