Óvíst er hversu mikil launaskerðing flugfreyja og -þjóna Icelandair verður eftir að starfshlutfall þeirra fer niður í 25%. Þetta segir Guðlaug Líney Jóhannsdóttir, starfandi formaður Flugfreyjufélags Íslands. Hún segist þakklát Icelandair fyrir að hafa farið þessa leið, engar uppsagnir flugfreyja og -þjóna verði að svo stöddu. Hún segir að áþekkar leiðir verði farnar hjá Air Iceland Connect.

Samkvæmt frumvarpi um rétt til greiðslu atvinnuleysisbóta samhliða minnkuðu starfshlutfalli, vegna tímabundins mögulegs samdráttar í starfsemi vinnuveitenda vegna kórónaveirunnar, sem samþykkt var á Alþingi fyrir helgi, verða fólki með allt að 400.000 krónur í mánaðarlaun tryggðar fullar tekjur. Laun þeirra sem eru með hærri mánaðarlaun geta aldrei samanlagt numið hærri fjárhæð en 90% af meðaltali heildarlauna, miðað við þriggja mánaða tímabil áður en launamaður missti starf sitt að hluta.

Mikill samhugur í stéttinni

„Við sem stéttarfélag þökkum fyrir þessa nýju leið sem er að gera félaginu kleift að draga úr uppsögnum, þær verða engar að svo stöddu,“  segir Guðlaug. „Það  verður einhver launaskerðing fyrr ákveðinn hóp, launatöflurnar okkar eru byggðar eftir starfsaldri. Öll laun þeirra, sem eru með 400.000 eða minna í föst mánaðarlaun, eru tryggð og ég held, svona fljótt á litið, að langflestir verði fyrir minna en 10% tekjuskerðingu. En það liggur ekki endanlega fyrir.“ 

„Við sem stéttarfélag þökkum fyrir þessa nýju leið sem er að gera félaginu kleift að draga úr uppsögnum“ 

Guðlaug segir mikinn samhug vera í stéttinni. „Það eru allir að leggjast á eitt, það er bara þannig. Auðvitað eru margir óöryggir og eiga eftir að átta sig á þessum breytingum  og það er meira en skiljanlegt. En fólk virðist almennt til í að leggja sitt af mörkum. Það var biðlað til hópsins um að taka launalaust leyfi og einhverjir völdu það af ýmsum ástæðum, en fjöldi þeirra liggur ekki fyrir.“ 

Hún segir að félagið hafi verið í nánu samstarfi við stjórnendur Icelandair um útfærslu þessara aðgerða. „Við höfum fundað sleitulaust með Icelandair allan tímann og höfum verið með í ráðum í gegnum allt ferlið.“  

Guðlaug segir að svipaðar aðgerðir séu fyrirhugaðar hjá Air Iceland Connect. Þar verði rafrænn upplýsingafundur fyrir starfsmenn haldinn klukkan 14 og líkt og hjá Icelandair verði engar uppsagnir í hópi flugfreyja -og þjóna. „Hugsanlega verður starfshlutfall fólks þar skert eitthvað minna,“ segir hún.

Segir aðgerðirnar nauðsynlegar

Í tilkynningu sem Bogi Nils Bogason, forstjóri Icelandair, sendi starfsmönnum félagins núna í morgun segir að aðgerðirnar hafi verið nauðsynlegar. „Ég legg áherslu á að þessar aðgerðir eru nauðsynlegar til að tryggja framtíðarrekstur félagsins. Við höfum staðist ýmis konar áföll í gengum tíðina, hvort sem það hafa verið barátta við náttúruöflin, efnahagslægðir eða aðrir utanaaðkomandi þættir. Það hefur tekist með samstöðu og útsjónarsemi og síðast en ekki síst þeim einstaka baráttuanda og krafti sem svo sannarlega hefur sýnt sig undanfarna daga og vikur. Ég er stoltur og þakklátur að tilheyra þeirri öflugu liðsheild sem við myndum saman. Ég er sannfærður um að við munum komast í gegnum þessar krefjandi aðstæður og búa þannig í haginn að félagið geti gripið tækifæri á mörkuðum okkar þegar ástandið verður eðlilegt aftur,“  skrifaði Bogi Nils til starfsfólks.