Bjarni Már Magnússon, prófessor við lagadeild Háskólans í Reykjavík, furðar sig á því að Hæstiréttur hafi boðið Mads Bryde Andersen, prófessor við Kaupmannahafnarháskóla, að halda ræðu á hátíðarsamkomu um helgina í tilefni af 100 ára afmæli Hæstaréttar Íslands. Skoðanir hans á Mannréttindadómstól Evrópu (MDE) séu umdeildar, skrif hans hafi lítil áhrif haft innan fræðanna og umfjöllunarefnið hafi ekki passað við viðburðinn.

Andersen hefur meðal annars hvatt Dani til að komast hjá því að dómar MDE teljist bindandi þar í landi. Stundin greindi frá því á mánudag að lögmönnum þætti undarlegt að prófessorinn hafi verið valinn til að halda ávarp, í ljósi þess að fyrir yfirdeild MDE liggur nú mál sem varðar íslenska réttarkerfið. MDE dæmdi í mars í fyrra íslenska ríkið brotlegt vegna vinnubragða Sigríðar Andersen dómsmálaráðherra þegar hún skipaði fjóra dómara við Landsrétt í trássi við mat hæfnisnefndar sumarið 2017. Íslensk stjórnvöld áfrýjuðu málinu til yfirdeildar MDE og fór málflutningur fram 5. febrúar síðastliðinn.

Bjarni Már MagnússonPrófessor við lagadeild HR segir ekki augljóst af hverju Hæstiréttur bauð Andersen að flytja ræðu um málefnið.

Forseti og varaforseti Hæstaréttar tóku ákvörðun um að erindi Andersen yrði hluti af dagskránni. Í svari við fyrirspurn í Fréttablaðinu í gær er hann sagður einn fremsti fræðimaður á sviði lögfræði á Norðurlöndunum. „Hann hefur í ræðu og riti látið sig miklu varða starfsemi og aðferðarfræði alþjóðlegra dómstóla og dómstóla á Norðurlöndum,“ segir í svari Hæstaréttar

Í færslu á Twitter segir Bjarni Már að svar Hæstaréttar sé áhugavert. „Í framhaldi af því verð ég að benda á að mjög lítill hluti ferils danska prófessorsins er helgaður starfsemi og aðferðarfræði alþjóðlegra dómstóla,“ skrifar hann. „Hann hefur skrifað lítillega um alþjóðlega gerðardóma á fræðilegum vettvangi og birt þrjár fræðigreinar á dönsku (2017, 2009 og 1997 (eina bls.)) um málefni er tengjast MDE (skv. birtingarskrá hans á heimasíðu Kaupmannahafnarháskóla). Google Scholar skráir engar tilvísanir í MDE greinar hans.“

Bjarni Már bendir á að aðrir norrænir sérfræðingar á sviðinu hafi ritað greinar og bækur sem hafa hundruðir eða jafnvel þúsundir tilvísana. „Óháð umdeildum skoðunum mannsins þá er ekki augljóst af hverju hann var þarna og hvers vegna umfjöllunarefni hans þótti passa á svona viðburði.“