„Maní á heima hér,“ hrópaði hópur fólks sem kom saman við Stjórnarráðið í miðborg Reykjavíkur í hádeginu og mótmælti fyrirhugaðri brottvísun transpiltsins Manís og fjölskyldu hans.
Fyrir liggur að umsókn þeirra um alþjóðlega vernd verður ekki tekin til efnisvinnslu hjá Útlendingastofnun vegna þess að lagaleg heimild er fyrir því að vísa þeim beint úr landi á grundvelli Dyflinnar-reglugerðarinnar.
Fjölskyldunni, Ardeshir, Shokoufu og Maní, sem eru upprunalega frá Íran, en komu til Íslands í gegnum Portúgal, hafði verið tilkynnt að brottvísun yrði framfylgt af lögreglunni í gær, en henni var frestað vegna mótmæla.
Læknar þvertóku fyrir að brottvísunin færi fram eftir að Maní var lagður inn á barna- og unglingageðdeild Landspítalans á sunnudagskvöld, þar sem hann var í annarlegu ástandi vegna álagsins sem fylgdi fyrirhugaðri brottvísun.
Meðal þeirra sem hafa mótmælt eru kennarar í Hlíðaskóla, sem hafa sérstaka reynslu af því að liðsinna transbörnum.
Athugasemdir