Fimm kennarar í Hlíðaskóla hafa sent frá sér opið bréf til Áslaugar Örnu Sigurbjörnsdóttur dómsmálaráðherra með áskorun um að bjarga sautján ára transpilti sem gengur í Fjölbrautaskóla Suðurnesja frá því að vera fluttur úr landi á mánudaginn.
Íslensk yfirvöld komust að þeirri niðurstöðu að ekki skyldi taka umsókn hans og fjölskyldu hans um alþjóðlega vernd hér á landi og hefur þeim verið tilkynnt að þau verði flutt úr landi. Þau eru upprunalega frá Íran en komu til Íslands í gegnum Portúgal. Vegna þess að þau komu í gegnum skilgreint öruggt land töldu yfirvöld að mál þeirra félli undir Dyflinnarreglugerðina, sem kveður á um að hælisleitendur geti verið sendir aftur til landsins sem þeir ferðuðust í gegnum, í þessu tilfelli Portúgal.
Skylda til að vernda transbörn
Í samtali við Stundina á föstudag sagði móðir piltsins, Shokoufu, að þau óttist að verða fyrir hefndum. „Við erum í örvæntingarfullri leit að hjálp, en nú er okkur sagt að við þurfum að fara úr landi á mánudaginn,“ sagði hún.
Í yfirlýsingu kennaranna eru stjórnvöld hvött til að senda ekki trans barn, sem býr við öryggi hérlendis, í hættulegar aðstæður.
„Við hvetjum stjórnvöld til þess að endurskoða ákvörðun sína“
„Öryggi barna í samfélaginu varðar okkur öll og því er það skylda okkar að veita þessum dreng skjól ... Við undirrituð, kennarar í Hlíðaskóla sem sitjum í teymi er lætur sig málefni hinsegin barna varða, hvetjum stjórnvöld til þess að endurskoða ákvörðun sína um að senda trans barn, sem nú býr við öryggi í samfélagi sínu, í aðstæður þar sem það mun án efa óttast um líf sitt.“
Bætt líðan með stuðningi
Sonur Shokoufu og eiginmanns hennar, Ardeshir, heitir Maní. Maní er transstrákur en hafði ekki lifað sem slíkur áður en hann komst í öryggið á Íslandi. Undanfarna mánuði hefur hann stundað nám við Fjölbrautaskóla Suðurnesja og kann því vel, jafnvel þó að kennslustundir fari fram á íslensku. „Fyrst eftir að við komum til Íslands bjuggum við í Reykjavík og þá gekk ég ekki í skóla. En eftir að við fluttum til Keflavíkur hef ég gengið í skóla og er búinn að eignast nokkra vini. Það hefur bætt líðan mína mikið,“ sagði hann í Stundinni í gær. Hann hittir sálfræðing reglulega og er kominn í samband við hinsegin samfélagið á Íslandi, sem hann segir hafa hjálpað sér mikið.
Öryggi Maní er á okkar ábyrgð
Opið bréf til Áslaugar Örnu Sigurbjörnsdóttur,dómsmálaráðherra
Ályktun frá kennurum í Hlíðaskóla, skóla sem er leiðandi í málefnum hinsegin barna:
17 ára barn sem kom með foreldrum sínum til landsins bíður þess að vera sent til baka til Portúgal, en þaðan má búast við að fjölskyldan verði send til Íran.
Í þriðju grein Barnasáttmála Sameinuðu þjóðanna er kveðið á um að þegar gerðar séu ráðstafanir, sem varði börn, skuli ávallt það hafa forgang sem barni er fyrir bestu.
Barnið sem nú á að senda burt frá Íslandi er trans drengur. Í Hlíðaskóla höfum við undanfarin ár lagt okkur fram við að gera skólaumhverfið að góðum stað fyrir öll börn. Trans börn eru í meiri hættu en önnur börn þegar kemur að félagslegri einangrun og ofbeldi.
Öryggi barna í samfélaginu varðar okkur öll og því er það skylda okkar að veita þessum dreng skjól. Í frásögnum fjölmiðla höfum við getað lesið að foreldrar sjá jafnvel ástæðu til þess að flytja frá einu byggðalagi til annars til þess að trans barn njóti öryggis í nærumhverfi sínu. Barnið sem nú á að vísa frá Íslandi hefur upplifað öryggi í sínu nærumhverfi hér. Það getur ekki gengið að slíku öryggi í flóttamannabúðum í Portúgal og enn síður í heimalandi sínu, Íran.
Við undirrituð, kennarar í Hlíðaskóla sem sitjum í teymi er lætur sig málefni hinsegin barna varða, hvetjum stjórnvöld til þess að endurskoða ákvörðun sína um að senda trans barn, sem nú býr við öryggi í samfélagi sínu, í aðstæður þar sem það mun án efa óttast um líf sitt.
Hildur Heimisdóttir
Anna Flosadóttir
Hjalti B. Valþórsson
Rakel Guðmundsdóttir
Þórey Þórarinsdóttir
Athugasemdir