„Þetta er óvænt og afskaplega ánægjulegt. Ég átti frekar von á að krafan yrði ekki samþykkt, enda er algengast að ekki sé fallist á kröfu um frestun réttaráhrifa,“ segir Magnús Davíð Norðdahl, lögmaður hjónanna. Kærunefnd útlendingamála vísar til hagsmuna nýfædds barns þeirra Raziu Abassi og Ali Ahmadi, í rökstuðningi þeirrar ákvörðunar að fallast á kröfu um frestun réttaráhrifa í máli þeirra. Frestunin felur það í sér að þeim er heimilt að dvelja hér á landi á meðan mál þeirra er rekið fyrir dómi. 

Þau Razia og Ali, sem eru 18 og 19 ára gömul, komu til Íslands síðastliðið sumar. Þá var Razia gengin nokkra mánuði með fyrsta barn þeirra. Þau flúðu heimaland sitt Afganistan fyrir fimm árum og hafa síðan verið á hrakhólum, dvalist í Íran, Tyrklandi og síðast í Grikklandi. Þar hlutu þau alþjóðlega vernd, sem að þeirra sögn var verra en að hafa hana ekki, því það þýddi að þau höfðu ekki lengur rétt á að dvelja í húsnæði ætluðu flóttamönnum, en höfðu samt sem áður litla sem enga möguleika á að sjá sér farborða og urðu fyrir miklum fordómum og misrétti. Þau sögðu frá því í viðtali í Stundinni að þau hafi ákveðið að yfirgefa Grikkland þegar gengið var í skrokk á henni á götu úti, en hann hafi nokkrum sinnum lent í slíkum árásum. 

Razia og Ali sóttu um alþjóðlega vernd á Íslandi en Útlendingastofnun hafnaði þeirri beiðni 2. september, á þeim grundvelli að þau hefðu þegar vernd í Grikklandi. Sú ákvörðun var kærð til kærunefndar útlendingamála, sem staðfesti synjunina 5. desember. Þá var Razia nær fullgengin með barn þeirra, sem fæddist á annan í jólum.

Eftir að hafa fengið synjanirnar tvær leituðu hjónin til Magnúsar. Hann lagði fyrir þeirra hönd fram tvær kröfur til kærunefndar útlendingamála. Annars vegar um frestun réttaráhrifa, sem nú hefur verið samþykkt, og hins vegar um endurupptöku málsins. Ekki hefur borist svar við þeirri kröfu. 

Ljóst er að mál hjónanna fer nú fyrir dóm. „Nú höfum við fimm daga til að stefna í málinu og munum gera það í vikunni og óska jafnaframt eftir flýtimeðferð,“ segir Magnús. Hann segir að í ljósi reynslunnar sé ólíklegt að fallist verði á flýtimeðferð. Málinu verði því stefnt inn með hefðbundnum hætti og það geti því tekið allt að því átta mánuði að fá meðferð fyrir dómi.

„Nú höfum við fimm daga til að stefna í málinu og munum gera það í vikunni og óska jafnaframt eftir flýtimeðferð“ 

Sú breyting var gerð á reglugerð um útlendinga síðastliðið sumar að Útlendingastofnun var gert heimilt að taka til efnismeðferðar umsókn barns sem hefur fengið vernd í öðru ríki, séu meira en tíu mánuðir liðnir frá því að umsókn barst íslenskum stjórnvöldum. Áður var fresturinn 12 mánuðir. Líklegast er að sá tímafrestur muni líða, á meðan þau Razia og Ali bíða þess að mál þeirra fari fyrir dómi. Á meðan á bið þeirra stendur, eftir því að mál þeirra fái niðurstöðu dóm, eru því allar líkur á að þau uppfylli þessi skilyrði sem leiða til þess að þau fái efnismeðferð, óháð niðurstöðu dómsins. „Þetta er því einstaklega ánægjulegur áfangasigur,“ segir Magnús.