Vefurinn mbl.is birtir fréttir þrátt fyrir verkfall Blaðamannafélags Íslands sem stendur yfir til klukkan 22 í kvöld. Hefur á þriðja tug frétta birst á vefnum frá því verkfallið hófst kl. 10. Hið sama hefur verið uppi á teningnum í fyrri verkföllum. Blaðamannafélag Íslands hefur stenftn Árvakri, útgáfufélagi mbl.is, fyrir félagsdóm vegna þessa. 

Mbl.is birti tilkynningu á vef sínum vegna málsins. „Þetta er þriðja verk­fallið af þessi tagi sem boðað hef­ur verið til og eins og áður verður fréttaþjón­usta á mbl.is í all­an dag, en frétt­irn­ar skrifa á fyrr­nefndu tíma­bili þeir sem ekki eru fé­lag­ar í Blaðamanna­fé­lagi Íslands,“ segir í tilkynningunni. „Mbl.is sinn­ir afar þýðing­ar­miklu hlut­verki sem fréttamiðill en gegn­ir um leið mik­il­vægu ör­ygg­is­hlut­verki. Af þess­um sök­um er allt kapp lagt á að vef­ur­inn loki aldrei, jafn­vel þó að úr fréttaflæði kunni að draga í langvar­andi verk­falli.“

Á meðal fyrirsagna fréttanna sem hafa verið birtar eru „Spá 10 stiga hita í Reykja­vík“, „Leynd­ar­dóm­ar uppþvotta­véla­töfl­unn­ar“ og „Inga Lind og Árni sam­an á ný“.

Fimmtán starfsmönnum Árvakurs, útgáfufélags Morgunblaðsins, mbl.is og K100, var sagt upp í gær. Ritstjóri Morgunblaðsins og viðskiptaritstjóri þess hafa tengt uppsagnirnar við verkföll netblaðamanna, þrátt fyrir að útgáfufélagið hafi verið rekið með 415 milljón króna tapi í fyrra og 284 milljón króna tapi árið 2017.

Vinnustöðvun vefblaðamanna, ljósmyndara og tökumanna mun standa yfir í 12 klukkutíma í dag, frá kl 10 til 22. Nær vinnustöðvunin til Morgunblaðsins, Fréttablaðsins, Sýnar og RÚV að hluta. Hefur Blaðamannafélag Íslands áréttað að ekkert skuli birt á vef á þessum tíma. Stundin og fleiri miðlar hafa þegar náð samningi við Blaðamannafélagið.