Skjólstæðingum Útlendingastofnunar, sem óska eftir alþjóðlegri vernd á Íslandi, er hótað ákæru verði þeim á þau mistök að ganga inn á einkalóðir í nágrenni heimilis síns. Þetta kemur fram í tilkynningu sem hangir uppi á vegg á heimili hælisleitenda í Arnarholti á Kjalarnesi þar sem Útlendingastofnun sér þeim fyrir húsnæði.

Á tilkynningunni má sjá loftmynd af svæðinu í kringum Arnarholt og rauða línu sem liggur eftir veginum frá heimilinu og að næsta strætóskýli sem er við Olís-stöð í um hálftíma göngufjarlægð. Eru íbúar beðnir um að fylgja rauðu línunni og þeim jafnframt tilkynnt að þeir verði ákærðir verði þeir gripnir inni á einkalóðum.

„Takið eftir. Fylgið rauðu línunni þegar þið gangið að strætóskýlinu (Olís) og stígið ekki inn á einkalóðir – hver sá sem staðinn er að því fara inn á einkalóð verður ákærður,“ segir í tilkynningunni. 

Fylgið rauðu línunni „Takið eftir. Fylgið rauðu línunni þegar þið gangið að strætóskýlinu (Olís) og stígið ekki inn á einkalóðir – hver sá sem staðinn er að því fara inn á einkalóð verður ákærður.“

Skilaboðin eru afdráttarlaus. Því er slegið föstu að hver sá sem fari inn á einkalóð, hvort sem það er fyrir mistök eður ei, verði ákærður. Hvernig Útlendingastofnun hyggst framfylgja þessari hótun er óljóst en stofnunin fer ekki með ákæruvald enda saksóknarar og lögreglustjórar þau embætti á Íslandi sem fara með slíkt vald. „Ákærendur eru ríkissaksóknari, héraðssaksóknari og lögreglustjórar,“ segir í 18. gr. laga um meðferð sakamála þar sem fjallað er um ákæruvald á Íslandi.

Á loftmyndinni af Arnarholti og nágrenni, sem fylgir umræddri tilkynningu, sést í nokkur hús, ræktarland sem og óræktað land. Í fjórða kafla laga um náttúruvernd er fjallað um almannarétt og 17. gr. kveður á um að almenningi sé „heimil för um landið og dvöl þar í lögmætum tilgangi“. 

Samkvæmt 231. gr. almennra hegningarlaga getur varðað sektum eða fangelsi að ryðjast heimildarlaust inn í hús eða skip eða að neita að fara þaðan þegar þess er krafist. Í 242. gr. sömu laga kemur hins vegar fram að brot gegn 231. gr. geti einungis sætt ákæru eftir að sá sem misgert er við krefst þess. Eftir því sem Stundin kemst næst eru þó almennt ekki gefnar út ákærur þegar fólk fer inn á einkalóð nema hún sé vel afgirt og viðkomandi neiti að yfirgefa staðinn.