„Hug­myndir um Hvamms­virkjun, Holta­virkjun og Urriða­foss­virkjun eiga rót sína að rekja til stjórn­mála­manna sem trúa á stór­iðju sem heild­ar­lausn fyrir alþýðu þessa lands.“ Þetta segja hátt í fjör­tíu bændur á bökkum Þjórsár í aðsendri grein í Bænda­blað­inu í dag. Þar mót­mæla þeir fyr­ir­hug­uðum virkj­unum í neðri hluta Þjórsár.

„Verði af þessum fram­kvæmdum mynd­ast þrjú uppi­stöðu­lón í far­vegi Þjórsár. Þau skerða blóm­legar sveitir beggja vegna árinnar þar sem nú er stund­aður arð­samur land­bún­aður. Um er að ræða stór stöðu­vötn sem drekkja munu gróðri og jarð­vegi þar sem þau leggj­ast upp á bakka árinnar. Tún og beit­ar­land munu hverfa undir vatn og mal­ar­hauga,“ skrifa bænd­urnir meðal ann­ars.

Þeir benda einnig á að mörg virk eld­fjöll séu á upp­taka­svæðum Þjórsár, meðal ann­ars Hekla, Tungna­fells­jök­ull og Bárð­ar­bunga. Verði nátt­úru­ham­farir á svæð­inu verða þegar fjöl­mörg orku­ver í hættu, það er Búr­fells­virkjun, Sult­ar­tanga­virkjun, Hraun­eyja­foss­virkjun, Sig­öldu­virkjun, Búð­ar­háls­virkjun og Vatns­fells­virkjun.

Þess má geta að ítar­lega er fjallað …