Í dag bankaði Sema Erla Serdar upp á, á heimili hælisleitenda á Skeggjagötu, til að sjá með eigin augum hversu mikið af húsgögnum skortir þar. „Það vantar bókstaflega allt þarna. Við sáum það strax þegar við komum þarna inn að það vantar mun meira af húsgögnum en við héldum í morgun,“ segir hún. 

Sema Erla las í gærkvöld frétt Stundarinnar þar sem sagt er frá því að hælisleitendur skorti meðal annars hirslur og stóla til að sitja á. Þeir borði því ýmist í rúmum sínum eða á gólfinu. Í kjölfar lesturins sendi hún út neyðarkall á Facebook, þar sem hún lýsti eftir húsgögnum. Viðbrögðin létu ekki á sér standa.

Mynd: Hólmfríður Sigurðardóttir

„Það er augljóst að okkur vantar mun meira en við héldum fyrst. Það eru ekki einu sinni gardínur fyrir gluggunum þarna. Ofnarnir eru bilaðir og það þarf að laga nokkra glugga,“ segir Sema Erla. Hún hefur safnað saman hópi fólks sem er búið verða sér út um bíla til að sækja húsgögn og ætlar að kippa málinu í liðinn strax í dag. Hún hvetur fólk til þess að halda áfram að bjóða fram húsgögn. „Þetta eru aðstæður sem er ekki fólki sæmandi að búa við. Það vantar allt, stóla, borð, lampa, herðatré. Ég opnaði eldhússkápana og þeir voru tómir. Það vantar diska, glös og hnífapör. Allt.“

Frétt Stundarinnar byggir á viðtali sem birtist í Stundinni í upphafi október, við ungan hælisleitanda sem býr á Skeggjagötu. Þar lýsir hann ömurlegum aðstæðum í því húsnæði sem hælisleitendum stendur til boða á Íslandi. Þrátt fyrir lýsingar hans breyttist lítið sem ekkert. 

Sema Erla biður alla sem geta aðstoðað að hafa samband í síma 822-8904. Hún og fleiri verði svo á Álfhólsvegi 145, vinstra megin, frá klukkan 16.30 í dag. Þangað sé hægt að koma með muni og aðstoða við að sækja og úthluta.