Sigmundur Davíð Gunnlaugsson, fyrrverandi forsætisráðherra og þingmaður Framsóknarflokksins, hefur algera sérstöðu meðal þingmanna og nefndarmanna í utanríkismálanefnd Alþingis, þar sem hann mætir sjaldan til nefndarstarfaa og mætir seint þegar hann mætir, ef frá er talið eitt skipti.
Þetta sýna upplýsingar á vef þingsins.
Laganeminn Helgi Bergmann vakti fyrst athygli á málinu í Facebook færslu sem hefur vakið mikla athygli.
Aldrei við atkvæðagreiðslu á árinu
Frá því Alþingi var sett þann 6. desember hefur Sigmundur Davíð verið fjarverandi í 87 prósent atkvæðagreiðsla. Hann var seinast viðstaddur í atkvæðagreiðslu þann 22. desember á seinasta ári þegar hann samþykkti mál um frestun á fundum Alþingis. Síðan þá hefur hann verið fjarverandi og ekki kallað inn varamann í sinn stað.
Auk þingsetu, er Sigmundur Davíð aðalmaður í utanríkismálanefnd. Fastir fundir í nefndinni eru á þriðjudögum og fimmtudögum en frá því nefndin hóf störf sín í lok janúar hefur Sigmundur aðeins mætt á fimm fundi af 19. Þegar hann hefur mætt hefur hann mætt of seint, fyrir utan eitt skipti. Mest hefur Sigmundur komið einum klukkutíma og 41 mínútu of seint, en þeim fundi var slitið 19 mínútum síðar.
Á fundi utanríkismálanefndar mæta fagaðilar úr ráðuneytum og ræða málefni sem varða samskipti Íslands við erlend ríki og alþjóðastofnanir, varnar- og öryggismál, útflutningsverslun, málefni Evrópska efnahagssvæðisins og þróunarmál, svo og utanríkis- og alþjóðamál almennt.
Þrátt fyrir að mæta seint eða ekki til vinnu fær Sigmundur Davíð fullt þingfararkaup fyrir starf sitt. Þingfararkaup er 1.101.194 krónur á mánuði og þar sem Sigmundur er þingmaður í Norðausturkjördæmi, eftir að hann skráði sig til heimilis á eyðibýli í eigu tengdaforeldra sinna á Fljótsdalshéraði, á hann rétt á samtals 204 þúsund krónur á mánuði í skattfrjálsar tekjur vegna húsnæðis- og dvalarkostnaðar, ferðakostnaðar og starfskostnaðar.
Sjá einnig: Sigmundur hefur ekki mætt í neina atkvæðagreiðslu á haustþingi
Brást illa við fyrirspurnum um fyrri fjarvistir
Sigmundur hefur áður vakið athygli fyrir fjarvistir á þingi en þann 17. desember á seinasta ári gekk Sigmundur Davíð út úr viðtali hjá RÚV þegar hann var spurður út í fjarvistir sínar.
Sigmundur lýsti óánægju sinni með störf Sunnu Valgerðardóttur, fréttamanns RÚV, í viðtalinu.
„Sko, þessi viðtöl við þig, eiga þau öll að vera svona, á þessum nótum? Á 100 ára afmæli flokksins líka. Síðast baðstu mig um að veita þér viðtal á ákveðnum forsendum og það gekk ekki alveg eftir. Svo mætirðu hér í 100 ára afmæli og spyrð spurninga eins og þessara, á þetta bara að vera svona. Ekkert mætt í vinnuna? Hvers konar nálgun er þetta á viðtal?“
„Ekkert mætt í vinnuna? Hvers konar nálgun er þetta á viðtal?“
Sunna vísaði til langvarandi fjarvista Sigmundar: „Þú hefur ekki mætt á Alþingi síðan það kom saman, það er eðlilegt að spyrja hvers vegna ekki.“
„Þá geturðu bara beðið mig um viðtal um það,“ svaraði Sigmundur og vísaði til helgi hundrað ára afmælis Framsóknarflokksins. „Þú kemur ekki hingað og biður mig um viðtal um afmæli flokksins og kemur með útúrsnúninga eins og þetta.“
Þá beindi hann spjótum sínum að fréttamanni og sagði meðal annars: „Voðaleg reiði er þetta í Ríkisútvarpinu, og sérstaklega þér í minn garð. Ég hef fylgst með umræðum í þinginu og störfunum þar eins og aðrir þingmenn. Segjum þetta gott.“
Ekki náðist í Sigmund Davíð Gunnlaugsson við gerð þessarar fréttar, þrátt fyrir ítrekaðar tilraunir.
Athugasemdir