Pawel Bartoszek, þing­maður Við­reisnar, heldur því fram að skattar séu ofbeldi. Þetta segir hann í þræði á Facebook-síðu sinni þar sem hann tjáir sig um ákvörðun kjara­ráðs um að hækka laun þing­manna um 340 þús­und krónur á mán­uði. Pawel segir að laun þing­manna þurfi að vera sam­keppn­is­hæf og þing­menn fjár­hags­lega sjálf­stæðir. Engu að síður séu hækk­anir á þing­ara­kaupi sem kjara­ráð færði þing­mönnum of háar. „Þetta eru pen­ingar sem teknir eru af öðru fólki með ofbeldi. Það er ekki endi­lega sjálf­sagt að ég, verk­efna­stjóri hjá alþjóð­legu stór­fyr­ir­tæki, fái hærri upp­hæð við hver mán­aða­mót við það að setj­ast á þing. Í raun­inni er það algjört rugl,“ skrifar Pawel. 

Illugi Jök­uls­son, pistla­höf­undur, blandar sér í umræð­urnar og segir það ekki rétt að laun þing­manna séu tekin með ofbeldi af öðru fólki. „Við höldum úti þessu sam­fé­lagi með sam­komu­lagi, ekki ofbeldi,“ skrifar Illugi meðal ann­ars. „Já skattar eru ofbeldi,“ svarar Pawel og deilir í kjöl­farið grein eftir Jón Steins­son hag­fræð­ing. 

Í henni seg­ist Jón fylgj­andi því að ríkið leggi skatta á borg­ar­ana til þess að öllum standi til boða grunn heil­brigð­is­þjón­usta og mennta­kerfi, en færir engu að síður rök fyrir því að skatt­lagn­ing sé ofbeldi af hálfu rík­is­ins. „Ein­hverjir vilja ef til vill malda í móinn varð­andi þessa orða­notkun. En ég tel að það sé ekki skyn­sam­legt. Það er mik­il­vægt fyrir okkur sem styðjum skatt­lagn­ingu umfram það sem er nauð­syn­legt til þess að halda uppi lögum og reglu í land­inu að hafa það einatt hug­fast að fólk greiðir skatt­ana sína ekki sjálf­vilj­ugt. Það þarf því að fara var­lega þegar skattar eru lagðir á fólk,“ skrifar Jón. 

Pawel var í öðru sæti á lista Við­reisnar í Reykja­vík­ur­kjör­dæmi suður. Hann er stærð­fræð­ingur og hefur verið vin­sæll pistla­höf­undur hjá Frétta­blað­inu und­an­farin ár.