Ólafur Ragnar Grímsson forseti hefur boðað til blaðamannafundar á Bessastöðum síðar í dag. Hann gefur ekki upp efni fundarins.

Í fréttatilkynningu til fjölmiðla er gefið upp númer hjá Örnólfi Thorssyni forsetaritara og sagt að „nánari upplýsingar“ fáist þar. Örnólfur sagðist í samtali við Stundina ekki geta veitt neinar nánari upplýsingar.

Spurður um efni fundarins segir Örnólfur: „Það kemur bara á daginn.“

Aðspurður hvort Ólafur Ragnar væri að fara að bjóða sig fram að nýju til embættis forseta Íslands sagði Örnólfur: „Ég veit það ekki.“

Uppfært: Ólafur Ragnar tilkynnti á fundinum að honum hafi aftur snúist hugur um að hætta sem forseti og muni því bjóða sig fram á ný.

Fimmtán einstaklingar hafa boðað framboð sitt til forseta. Nú síðast steig fram Magnús Ingi Magnússon, betur þekktur sem Maggi í Texasborgurum, og sagðist bjóða frían ostborgara með frönskum fyrir meðmæli, en 1.500 undirskriftir þarf til að öðlast kjörgengi í forsetakosningunum.

Eftirfarandi einstaklingar hafa boðað framboð:

Ari Jósepsson, youtube-listamaður

Andri Snær Magnason rithöfundur

Ástþór Magnússon athafnamaður

Benedikt Kristján Mewes mjólkurfræðingur

Bæring Ólafsson forstjóri

Elísabet Kristín Jökulsdóttir rithöfundur

Guðmundur Franklín Jónsson athafnamaður

Guðrún Margrét Pálsdóttir hjúkrunarfræðingur

Halla Tómasdóttir athafnakona

Heimir Örn Hólmarsson rafmagnstæknifræðingur

Hildur Þórðardóttir, heilari og þjóðfræðingur

Hrannar Pétursson, fyrrverandi upplýsingafulltrúi

Magnús Ingi Magnússon veitingamaður

Sturla Jónsson bílstjóri

Vigfús Bjarni Albertsson sjúkrahúsprestur