Borið hefur á mikilli óánægju með fyrirhuguð mótmæli á Austurvelli á morgun, 17. júní, en um 3400 manns hafa boðað komu sína á mótmælafund. Guðfinna Jóhanna Guðmundsdóttir, borgafulltrúi Framsóknar og flugvallarvina, skrifaði um málið á Facebook síðu sína í morgun og þá skrifaði Kolbrún Bergþórsdóttir, ritstjóri DV, leiðara í blað dagsins þar sem hún sagðist vonast til þess að þjóðin fái að hvíla sig á reiðinni á þjóðhátíðardaginn. Á mbl.is er meðal annars spurt hvort um sé að ræða fyrstu mótmælin á 17. júní og haft er eftir Arnari Rúnari Marteinssyni, aðalvarðstjóra hjá lögreglunni á höfuðborgarsvæðinu, að hann muni ekki eftir öðrum skipulögðum mótmælum á þjóðhátíðardaginn. „Ég hef nú bara verið hérna í 30 ár en ég man ekki eftir því. Það hafa einhverjir menn komið með skilti en engin skipulögð mótmæli,“ segir hann.

Stefán Pálsson sagnfræðingur vakti hins vegar athygli á því á Facebook- síðu sinni í morgun að mótmæli á þjóðhátíðardeginum væri engin nýlunda hér á landi. „Það man aldrei neinn neitt,“ segir hann og segir alla vera búna að gleyma Icesave-mótmælunum á Austurvelli 17. júní árið 2009 og Falun Gong mótmælunum árið 2002. Stefán segir fólk oft hafa mætt með mótmælaspjöld á hátíðarhöldin en sjaldgæfara sé að það stefni til mótmæla á sama tíma og hátíðarhöld fara fram. „Ég held að það sé að hluta til afleiðing samfélagsmiðla að í dag geturðu með mjög óformlegum hætti stefnt til mótmæla.“

Stundin rifjaði upp nokkur mótmæli á þjóðhátíðardegi Íslendinga. 

Frammíköll undir ræðu ráðherra 

Árið 2009 safnaðist hópur fólks saman við hátíðarsvæðið á Austurvelli til þess að mótmæla því sem því þótti betur mega fara og koma skoðunum sínum á framfæri, eins og segir í frétt Morgunblaðsins af málinu.