Dóttir Nadezdu Eddu Tarasovu, sem var myrt af eiginmanni sínum á Akranesi 13. apríl, kveður hana í minningargrein í Morgunblaðinu í dag.

Nadezda var starfsmaður Grundaskóla á Akranesi. „Mamma mín, Nadezda Edda Tarasova, var myrt þann 13. apríl 2016. Mamma var hjartahlý, skörp og góð kona sem vildi öllum vel,“ segir í grein dóttur hennar, Júlíu. „Við vorum afar nánar, hún var mér allt í senn mamma, systir og besta vinkona. Andlát hennar er mér og fjölskyldu minni svo ákaflega þungbært. Elsku mamma - við vitum að þú ert með okkur, við elskum þig og þú verður ævinlega í hjörtum okkar.“

Minningargrein Dóttir Nadezdu Eddu skrifar minningargrein um móður sína.

Mynd: Mbl

Nadezda skilur einnig eftir sig móður og barnabarn. Hún fæddist sjálf í Rússlandi 9. ágúst 1961 og er dóttir hennar, Júlía, búsett þar. 

Hún verður jarðsungin frá Akraneskirkjun í dag klukkan 14.30.

Samfélagið harmi lostið

Samfélagið á Akranesi var harmi lostið þegar fréttir bárust af því að hjón hefðu fundist látin í fjölbýlishúsi í bænum. Eiginmaður Nadezda, Guðmundur Valur Óskarsson, hafði glímt við veikindi. Lögreglan telur að hann hafi skotið eiginkonu sína til bana áður en hann svipti sig lífi. Þau höfðu verið gift í áratug.

Nadezda starfaði sem skólaliði í Grundaskóla og var vel liðin.