Kona, sem átti erindi í Garðaskóla, varð fyrir því að bíl hennar hafði verið pakkað kyrfilega inn í plast þegar hún kom aftur að honum á bílastæðinu.

Um var að ræða einhvers konar tilfelli borgaralegs réttlætis, þar sem ótilgreindir, almennir borgarar refsuðu konunni fyrir að leggja í stæði sem merkt var „vörumóttaka“, þótt nóg væri af lausum stæðum á bílaplaninu.

„Mér fannst þetta snilldarhugmynd hjá þeim,“ segir Egill Róbertsson, starfsmaður í íþróttamiðstöðinni Ásgarði, sem tók mynd af bifreiðinni og birti í hópnum Verst lagði bíllinn á Facebook. Hann segist ekki hafa tekið þátt í plöstuninni. „Ég kom bara þarna að þegar þetta var búið. Ég veit ekkert hverjir þetta voru.“

„Hún tók þessu frekar vel“

Plastaður bíll „Svona getur farið fyrir fólki sem að leggur framan við skilti sem á stendur: Vörumóttaka,“ skrifaði Egill Róbertsson við deilingu á mynd af bílnum.

Mynd: Egill Róbertsson

Konunni varð hverft við, en hún tók refsingunni vel. „Mér sýndist að konan, þegar hún kom, tæki þessu ekki illa. Hún tók þessu frekar vel,“ segir Egill.

Í kjölfarið hófst konan handa við að opna bílinn. „Hún var einhverjar tíu mínútur að þessu,“ segir Egill.

Tiltækinu er misjafnlega tekið af meðlimum í hópnum Verst lagði bíllinn. „Fullorðinn maður að plasta bíl... plís ekki fjölga þér,“ segir einn þeirra.