Íbúa í Reykjanesbæ, sem hafði um nokkurt skeið safnað flöskum og dósum til þess að fara með í endurvinnslustöðina Dósasel í Reykjanesbæ, brá heldur betur í brún þegar hann tæmdi poka á gólfi fyrirtækisins í síðustu viku. Með tómu flöskunum féllu fjölmargir kakkalakkar á gólfið, um tíu stykki, og var þá strax hringt í Ragnar Guðleifsson, en hann starfar sem meindýraeyðir á höfuðborgarsvæðinu.

Loka þurfti Dósaseli þennan daginn á meðan Ragnar gekk úr skugga um að þeir væru ekki fleiri á ferðinni auk þess sem öllum flöskum, dósum, pokum og öðru lauslegu var fargað. Þetta var ekki fyrsta útkallið hans Ragnars vegna kakkalakka á þessu ári. Þvert á móti þá hafa útköllin verið ansi mörg í ár og hefur þeim fjölgað gríðarlega á undanförnum árum.

„Já, það er orðið mun meira um þessi útköll en venjulega. Ég hef starfað við þetta í sex ár núna og hef aldrei séð jafn mörg tilfelli þar sem kakkalakkar hafa gert sig heimakomna hjá fólki. Þetta vandamál er ekki bara bundið við Suðurnesin þó svo að það hafi verið þannig í gamla daga í kringum herinn. Núna finnst hann um allt land,“ segir Ragnar.