Í gærkvöld birtist frétt á Hringbraut þar sem greint var frá því að Illugi Gunnarsson hafi verið í vinnuferð til Kína á vegum Orka Energy. Í þeirri frétt var því haldið fram að Illugi væri í aukastarfi hjá orkufyrirtækinu. Í samtali við Stundina segir Illugi þessa frétt vera á misskilningi byggð. Frétt Hringbrautar byggði á fréttatilkynningu frá menntamálaráðuneytinu þar sem sagt var frá vinnuferð Illuga til Kína, en í þeirri tilkynningu kemur fram að með í för hafi verið aðilar frá Marel og Orku Energy.

„Athygli vekur að ekki voru með í för forsvarsmenn fleiri íslenskra orkufyrirtækja. Það lítur óneitanlega heldur illa út að ráðherra sem þiggur ráðgjafalaun hjá fyrirtæki skuli nota stöðu sína sem ráðherra til að setja upp opinbera heimsókn til stórveldisins Kína og bjóða með í ferðina því fyrirtæki sem hann þiggur tekjur frá. Ríkissjóður kostar ferð ráðherrans og fylgdarfólks hans úr ráðuneytinu og utanríkisþjónusta þjóðarinnar er notuð til að skipuleggja heimsóknina,“ segir í frétt Hringbrautar.

Gleymska að taka ekki út ráðgjafalaun

Illugi segist hafi starfað hjá Orku Energy tímabundið meðan hann vék af þingi á árunum 2010 til 2012. Það hafi einfaldlega gleymst að breyta tengslaskráningu. „Það var gleymska að hafa ekki tekið þetta út. Vandinn er það sem menn skrá ekki, en ekki það sem þeir gleyma að afskrá,“ segir Illugi. Hann þiggi engin laun frá fyrirtækinu í dag og hann hafi aðeins verið ráðgjafi hjá þeim fyrir ríflega þremur árum.

Íslenska ríkið bar engan kostnað af fyrirtækjamönnum

Illugi ítrekar enn fremur að Íslenska ríkið hafi ekkert greitt fyrir aðilanna frá Marel og Orku Energy sem hafi verið með í för til Kína. Hann segir að starfsmenn Orka Energy hafi verið staddir í Kína og því hafi íslenska ríkið engan kostnað greitt af fundi þeirra. „Þeir voru algjörlega á eigin vegum. Íslenska ríkið bar engan kostnað af þessum mönnum,“ segir Illugi. Hann bætir við að allur ferðakostnaður við ferð Kristínar Ingólfsdóttur, rektor Háskóla Íslands, Ara Kristins Jónssonar, rektor Háskólans í Reykjavík  og Fríðu Björk Ingvarsdóttur, rektor Listaháskóla Íslands, hafi verið greiddur af viðkomandi skólum.