Konan sem íslenski læknirinn Emma Caroline Fernandez hefur verið dæmd fyrir hafa ráðist á í Ungverjalandi segist mjög ánægð með niðurstöðu dómsins í samtali við Stundina. Fórnarlambið, Funkebi Brambaifa, starfar sem læknir í heimalandi sínu, Nígeríu, og náði Stundin tali af henni rétt í þessu en hún frétti af niðurstöðu dómsins í gær. „Auðvitað er ég glöð. Þetta var komið á þann stað að ég hélt að enginn myndi gera neitt af því ég er svört. Ég var búin að gefast upp, því þetta gerðist árið 2012. Núna er árið 2016 og þetta er eiginlega smá yfirþyrmandi, en loksins kom réttlætið,“ segir Funkebi.
Emma var á miðvikudag dæmd í fimm ára skilorðsbundið fangelsi fyrir alvarlega líkamsárás en að sögn lögmanns hennar, Ingibjargar Ólöfu Vilhjálmsdóttur, hefur dóminum verið áfrýjað. Emma var dæmd fyrir að hafa árið 2012 byrlað Funkebi svefnlyf og barið hana í framhaldinu tvívegis í höfuðið með hamri.
Ekki náðist í Emmu við vinnslu fréttir en þegar Stundin ræddi við hana í október vildi hún ekki tjá sig um málið utan þess að hún lýsti sig saklausa.
Málið hefur verið nokkurn tíma í vinnslu út í Ungverjalandi en Emma tjáði ekki yfirmönnum sínum við lyflækningadeild Heilbrigðisstofnunar Suðurlands um alvarleika brotsins. Hún starfaði við lækningar allt fram til síðastliðins októbermánaðar þegar greint var frá málinu í íslenskum fjölmiðlum. Þá fór hún í launað leyfi. Hjörtur Kristjánsson, framkvæmdastjóri lækninga við HSU, segir í samtali við Stundina að hún hafi verið ráðin tímabundið til áramóta og hafi hún ekki sóst eftir starfinu að nýju.
Athugasemdir