Innan hins þrönga ramma sem hefðbundinni rútínu hins almenna Íslendings vinnst ekki mikill tími til þess að taka upp nýja hegðun, venjur og hefðir. Eitt getum við þó gert sem tekur stuttan tíma, gæti auðgað líf okkar, minnkað stress og bætt sambönd okkar við annað fólk: Faðmast.
Faðmlög framkalla vellíðan
Þegar við föðmumst sleppir líkaminn út hormóninu oxýtósín. Á íslensku er það kallað hríðahormónið, því það er eitt af þeim hormónum sem er ábyrgt fyrir því að framkalla hríðir og auka mjólkurframleiðslu. Það hefur einnig verið kallað ástarhormónið, því þegar við finnum fyrir væntumþykju gagnvart einhverjum er það oxýtósín sem lætur okkur líði vel. „Oxýtósín er taugapeptíð, sem í grunninn eykur traust og tengingar á milli fólks,“ segir sálfræðingurinn Matt Hertenstein við DePauw-háskóla. „Hormónið leggur hinn lífefnafræðilega grunn sem er nauðsynlegur fyrir okkur til þess að tengjast öðru fólki.“
Hjarta og blóðþrýstingur
Hormónin sem líkaminn leysir úr læðingi við faðmlög eru þó ekki aðeins góð upp á tilfinningalífið, heldur geta þau haft jákvæð áhrif á líkamlega heilsu á sama tíma. Þegar við snertumst virkjast í húðinni taugamóttakarar sem kallast pacinian corpuscles, en þeir senda taugaboð til heilans sem meðal annars lækkar blóðþrýsting. 
Börn
Faðmlög og snerting eru börnum nauðsynleg fyrir tilfinningalegan þroska. Rannsókn Emory-háskóla bendir til fylgni milli snertingar og streitulosunar. Í samantekt rannsóknarinnar er sagt að það eigi sérstaklega við um ungviðið, en börn sem upplifa mikla ást og snertingu eiga auðveldara með að takast á við stress þegar þau fullorðnast og eru í meira tilfinningalegu jafnvægi.
Þannig að það er ekki eftir neinu að bíða. Fyrir meiri gleði, aukið hreysti og framtíð barnanna: Föðmumst!
Athugasemdir