Þýska ríkið mun ekki bjarga Deutsche Bank eða öðrum fjármálastofnunum sem eiga í vanda um þessar mundir, fari svo að stofnanirnar lendi gjaldþroti. Þessar yfirlýsingar komu frá starfsmanni innan ríkisstjórnar Angelu Merkel, kanslara Þýskalands, í gær.
Merkel hitti einnig bankastjóra seðlabanka Evrópu, Mario Draghy, í gær. Þar var afstaðar ríkisstjórnarinnar ítrekuð: Að peningar skattgreiðenda yrðu ekki notaðir til þess að koma fjármálastofnunum í vanda til hjálpar, líkt og gert var í kjölfar fjármálahrunsins árið 2008 í Þýskalandi, Bandaríkjunum, Íslandi og víðar. Þessar yfirlýsingar koma þvert á raddir sem heyrst höfðu fyrr í vikunni, þess efnis að innan ríkisstjórnarinnar væru uppi áform að bjarga Deutsche Bank ef allt færi á versta veg.
Sekt sem lögð var á bankann, upp á 14 milljarða dollara, vegna ólöglegra fjármálagjörnina í aðdraganda hrunsins árið 2008 er á gjalddaga þann 6. desember næstkomandi. Stjórnendur bankans róa því lífróður þessa dagana til þess að fjármagna þá greiðslu. Virðist ekki vera mikil trú á því að sú fjármögnun takist, því einstaklingar og/eða stofnanir sem eiga hlutabréf í bankanum vinna að því hörðum höndum að losa sig við allar eignir sínar tengdar bankanum um þessar mundir.
Talsmaður seðlabanka Evrópu neitaði að tjá sig um það hvort Merkel og Draghi væru að ræða mál Deutsche Bank í gær. „Þau eru að ræða efnahagsmál Evru-svæðisins,“ lét hann hafa eftir sér.
Lægsta hlutabréfaverð í 30 ár - Ekki staðið eins vel í 20 ár
Framkvæmdarstjóri Deutsche Bank, John Cryan, sendi tölvupóst á 100.000 starfsmenn bankans þar sem hann fullvissaði alla um að fjármál bankans stæðu vel. Sagði hann bankann hafa verið fórnarlamb „spákaupmennsku og gróusagna“ sem væru ástæða þess að hlutabréfaverð í honum væri að hrynja. 
Hlutabréf í bankanum náðu sínum lægsta botni í 30 ár rétt áður en Cryan sendi tölvupóstinn, sem virðist hafa náð að róa einhverjar taugar. Tók hann einnig fram í póstinum að bankinn hefði ekki staðið eins vel í 20 ár.
Athugasemdir