Hin enska Susie Moore er afar vinsæll markþjálfi sem hefur verið fengin til að skrifa pistla fyrir Marie Claire og The Huffington Post svo eitthvað sé nefnt, en hún heldur að auki úti vefsíðu þar sem hún deilir góðum ráðum um hvernig auka megi hamingju, sjálfstraust og starfsframa. Í nýlegum pistli gefur hún lesendum átta góð ráð sem auka hamingjuna samstundis. Eins og Susie bendir á þá eigum við öll okkar daga þar sem okkur líður ekki nógu vel. Við vöknum eitthvað pirruð, fáum leiðinlegar fréttir eða erum af einhverjum ástæðum örlítið döpur. Þetta er hins vegar mjög eðlilegt og góðu fréttirnar eru þær að þú getur tekið meðvitaða ákvörðun um að bæta líðan þína með mjög einföldum aðgerðum. 

Hér eru átta ráð frá Susie Moore sem auka hamingju þína samstundis:

1.Hlátur

Hvað fær þig til að hlæja? Láttu það eftir þér! Uppáhalds grínþátturinn þinn eða jafnvel stutt myndskeið á YouTube geta hjálpað þér upp úr lægðinni í einum grænum. Rifjaðu upp fyndna lífsreynslu með vinum þínum eða maka sem fær ykkur bæði til að veltast um af hlátri. Rannsóknir sýna að hlátur styrkir ónæmiskerfið, veitir þér orku, dregur úr verkjum og verndar þig gegn alvarlegum afleiðingum streitu. 

2.Núvitund

Staldraðu við, þó ekki nema stundarkorn, og andaðu. Taktu eftir umhverfinu þínu – hljóðunum sem heyrast í herberginu, birtunni og hvernig þér líður í líkamanum. Við eigum það til að gleyma því að staldra við og meta ró og fegurð líðandi augnabliks. Þegar við lifum í núinu höfum við ekki áhyggjur af framtíðinni né upplifum við sektarkennd vegna fortíðarinnar. Núvitund færir okkur frið og fyrir vikið verðum við meira lifandi.