Nikolaj Olsen, annar þeirra skip­verja sem situr í gæslu­varð­haldi grun­aður um aðild að hvarfi Birnu Brjáns­dóttur, seg­ist hafa verið ofurölvi aðfara­nótt laug­ar­dags­ins 14. jan­úar og ber við nán­ast algjöru minnis­leysi sökum þess, sam­kvæmt heim­ildum Stund­ar­innar. Hann seg­ist ekki muna eftir því að hafa stígið upp í rauða Kia Rio-bíla­leigu­bíl­inn umrædda nótt.

Frá þessu greindi Nikolaj í sím­tali sem hann átti við kærust­una sína í Græn­landi. Nikolaj hringdi í hana þegar græn­lenska tog­ar­anum var snúið við vegna rann­sóknar máls­ins og honum siglt aftur til hafnar í Hafn­ar­firði.

Nikolaj Olsen Hringdi í kær­ustu sína þegar hann var á leið í land og sagð­ist hafa séð tvær stelpur aftan í rauða Kia Rio-bíla­leigu­bílnum. Hann sagð­ist þó ekki vita hvenær hann sá þær eða hvar hann var staddur.

Þá sagð­ist Nikolaj ekki heldur muna eftir því að hafa gengið um borð í togar­ann rétt eftir 06:10 á laug­ar­dags­morgn­inum en líkt og fjöl­miðlar hafa greint frá sést Nikolaj ræða við hinn skip­verj­ann sem er í gæslu­varð­haldi, Thomas Møller Olsen, í eina til tvær mín­útur, áður en sá síð­ar­nefndi ekur á brott.

En Nikolaj man eftir einu veiga­miklu atriði. Einu örstuttu en mik­il­vægu augna­bliki sem, sam­kvæmt heim­ildum Stund­ar­innar, hefur gefið lög­reglu ástæðu til þess að halda að menn­irnir tveir hafi ekki sam­ræmt fram­burði sína.

Veit ekki klukkan hvað eða hvar

Á ein­hverjum tíma­punkti aðfara­nótt laug­ar­dags­ins 14. jan­úar, eftir að hafa drukkið ótæpi­lega á skemmti­stað í mið­borg Reykja­víkur, seg­ist Nikolaj hafa litið í aft­ur­sæti rauða Kia Rio-bíla­leigu­bíls­ins, sem Thomas Møller ók, og séð tvær stelpur. Nikolaj seg­ist ekki vita klukkan hvað hann sá stelp­urnar eða hvar hann var staddur. 

Líkt og Stundin hefur greint frá reyndi Nikolaj ítrekað að ná sam­bandi við íslenska vin­konu sína aðfara­nótt laug­ar­dags­ins 14. jan­úar. Sumar hring­ing­arnar áttu sér stað á sama tíma og talið er að Birna hafi verið í rauða Kia Rio-bíla­leigu­bílnum.

Grímur Grímsson, yfir­lög­reglu­þjónn hjá lög­regl­unni á höf­uð­borg­ar­svæð­inu, segir lög­reglu nú vera að rann­saka þessar upp­lýs­ingar. Ekki er vitað hvort Nikolaj muni eftir þessum sím­hring­ingum eða ástæðu þess að hann var að reyna að ná í vin­konu sína umrætt kvöld. Vinkona Nikolaj starf­aði á skemmti­stað í mið­borg Reykja­víkur og var á vakt aðfara­nótt laug­ar­dags­ins 14. jan­úar þegar Nikolaj var vísað út vegna ölv­unar eftir að hann sofn­aði á einum af borðum stað­ar­ins í kjöl­far þess að hafa unnið átta stóra bjóra í lukku­hjóli stað­ar­ins.

Hættir að hringja rétt áður en Birna hverfur 

Nikolaj reyndi að hringja níu sinnum umrædda nótt. Hann hringdi fimm sinnum frá 03:55 til 05:19 en hætti síðan að hringja. Nokkrum mín­útum síðar er Birna talin hafa farið inn í rauða Kia Rio-bíla­leigu­bíl­inn. Nikolaj heldur síðan áfram að hringja rúmum fjöru­tíu mín­útum síðar eða klukkan 06:03. Það er rétt eftir að rauð bif­reið næst á örygg­is­mynda­vél í áhalda­húsi Golf­klúbbs Kópavogs og Garða­bæjar og skömmu áður en bíla­leigu­bíll­inn sést við Hafn­ar­fjarð­ar­höfn þar sem hann var stöðv­aður við togar­ann, klukkan 06:10. Nikolaj hringdi aftur 06:04 og aftur 06:44. Síðasta til­raun Nikolaj til að ná í vin­konu sína var síðan klukkan 11:55.

En af hverju hætti Nikolaj að hringja nokkrum mín­útum áður en að talið er að Birna hafi farið upp í rauða Kia Rio-bíla­leigu­bíl­inn? Sofnaði hann eða var hann að ræða við Birnu? Voru tvær stelpur í bílnum eða sá hann tvö­falt vegna ölv­unar? Þessum og fjölda ann­arra spurn­inga er ósvarað og reynir lög­reglan nú að púsla saman atburð­ar­rásinni með þeim fjölda ábend­inga, mynd­skeiða, ljós­mynda og sönn­un­ar­gagna sem hún hefur bæði fengið sent og aflað frá því rann­sóknin á hvarfi Birnu hófst.

Sagði hafa verið kastað upp yfir úlpuna

Samkvæmt upp­lýs­ingum frá lög­reglu liggur engin játn­ing fyrir í mál­inu og báðir menn neita sök. Lög­reglan hefur und­an­farna daga yfir­heyrt báða menn­ina en Grímur segir að engar yfir­heyrslur fari fram í dag en þeim sé þó ekki lokið.

Frétta­blaðið greindi frá því í dag að á meðal sönn­un­ar­gagna lög­reglu, sem lagt var hald á við leit í Polar Nanoq í síð­ustu viku, væri úlpa þriðja skip­verj­ans sem var hand­tek­inn nokkrum klukku­stundum á eftir Nikolaj og Thomas Møller. Samkvæmt heim­ildum Frétta­blaðs­ins hafði mað­ur­inn gleymt úlp­unni í rauða Kia Rio-bíla­leigu­bílnum.

Thomas Møller Olsen Samkvæmt skip­verjum um borð á Polar Nanoq gaf Thoms Møller þá skýr­ingu að kastað hefði verið upp á úlpu eins skip­verj­anna aðfar­arnótt laug­ar­dags­ins, eftir að hann hafði skilið hana eftir í bíla­leigu­bílnum sem hann leigði.

Það hafi vakið athygli skip­verj­ans á laug­ar­deg­inum að búið væri að þvo úlpuna hans. Hann hafi þó ekki hugsað mikið um það, ekki fyrr en Polar Nanoq var snúið við á þriðju­dag­inn í síð­ustu viku. Þá hafi vaknað grun­semdir hjá mann­inum, sem urðu til þess að hann gaf sig fram við sér­sveit Rík­is­lög­reglu­stjóra, sem þá var komin um borð í togar­ann. Eiganda úlpunnar var sleppt að loknum yfir­heyrslum en lög­reglan taldi sig geta úti­lokað aðild hans að mál­inu.

Þetta kemur heim og saman við heim­ildir Stund­ar­innar. Samkvæmt þeim gaf Thomas Møller þá skýr­ingu að kastað hafi verið upp yfir úlpuna í bíla­leigu­bílnum og því hafi hann tekið sig til og þrifið hana.

Þekkja Grindavíkurveg vegna Bláa lónsins

Þá greindi DV og síðar frétta­stofa RÚV frá því á þriðju­dag­inn að skil­ríki Birnu hafi fund­ist við leit lög­regl­unnar í græn­lenska tog­ar­anum Polar Nanoq. Samkvæmt heim­ildum RÚV fund­ust skil­ríkin í rusla­fötu. 

Lög­reglan telur að rauða Kia Rio-bíla­leigu­bílnum hafi verið ekið um 300 kíló­metra á meðan hann var í leigu. Samkvæmt útreikn­ingum lög­regl­unnar, þegar búið er að draga frá áætl­aðan akstur innan höf­uð­borg­ar­svæð­is­ins, standa eftir 100 til 150 kíló­metrar sem nú er verið að reyna að kort­leggja. Samkvæmt heim­ildum Stund­ar­innar telja þeir sem þekkja til áhafn­ar­innar að bíla­leigu­bílnum hafi að öllum lík­indum verið ekið suður Reykja­nes­braut og síðan Grinda­vík­ur­veg­inn í átt að Suð­ur­strand­ar­vegi.

„Þeir þekkja bara mið­borg­ina í Reykja­vík og síðan Bláa lónið. Þetta eru eig­in­lega einu tveir stað­irnir sem þessir skip­verjar fara á. Þegar ég las í fréttum að lög­reglan væri að skoða hvaða leið var ekið þennan morgun þá hugs­aði ég strax um Grinda­vík­ur­veg­inn,“ segir Íslend­ingur sem hefur aðstoðað útgerð­ina Polar Seafood sem á og rekur Polar Nanoq. Nokkrar leiðir koma þó til greina þegar aka á frá Hafn­ar­fjarð­ar­höfn að Sel­vogs­vita og er leiðin um Grinda­vík­ur­veg ein þeirra.

Skoða öldufar og sjávarstrauma

Lík Birnu fannst við Sel­vogs­vita á sunnu­dag­inn en lög­reglan telur lík­legt að hún hafi verið sett í sjó ann­ars staðar og að sjór­inn hafi borið hana upp í fjör­una. Vega­gerðin hefur meðal ann­ars aðstoðað við rann­sókn máls­ins og hefur komið upp­lýs­ingum um öldu­far og sjáv­ar­strauma á þessu svæði frá þeim tíma sem Birna hvarf í mið­borg Reykja­víkur og til sunnu­dags­ins 22. jan­úar, þegar lík hennar fannst.

Lög­reglan reynir enn að kort­leggja ferðir bif­reið­ar­innar frá því hún stöðvast við Hafn­ar­fjarð­ar­höfn rétt eftir klukkan sex, laug­ar­dags­morg­un­inn 14. jan­úar. Samkvæmt frétta­flutn­ingi sást annar mað­ur­inn ganga um borð í togar­ann en hinn ók á brott. Þá hefur lög­reglan greint frá því að ummerki á bíla­leigu­bílnum gefa til kynna að honum hafi verið ekið um grýttan veg.

Þau sem hafa upplýsingar um málið eru hvött til að hafa samband við lögreglu í síma 444 1000.