Agnes Sigurðardóttir, biskup Íslands, átti fund með konunum fimm sem lýstu kynferðislegu áreiti, siðferðisbrotum og óásættanlegri hegðun séra Ólafs Jóhannssonar, fyrrverandi sóknarprests í Grensáskirkju. Áfrýjunarnefnd úrskurðarmála innan kirkjunar lauk málinu í fyrra og komst að þeirri niðurstöðu að Ólafur hefði brotið siðferðislega á tveimur konunum. Var hann leystur frá embætti með því að embætti hans var lagt niður í vor.

Biskup og vígslubiskuparnir í Skálholti og á Hólum hafa nú sent þolendunum undirritaða yfirlýsingu vegna málsins. „Það er óásættanlegt að presturinn hafi brotið siðferðilega á konunum meðan hann var þjónandi prestur í Þjóðkirkjunni og í samskiptum við þær,“ segir í yfirlýsingunni. „Það er einnig sárt að þolendum hefur þótt skorta á að hlustað hafi verið á þær eða ekki fylgst með líðan þeirra af hálfu yfirstjórnar kirkjunnar á þeirri leið sem þær þurftu að ganga.“

Segir í bréfinu að kirkjunni beri að draga lærdóm af þessum atvikum og leggja sig fram um að laga þá ágalla sem komið hafa fram í ferli málsins. Þá verði siðareglur endurskoðaðar, forvarnir efldar og starfsfólk verði meðvitaðara um einkenni eða vísbendingar um kynferðisbrot. Kirkjan eigi að vera öruggur staður að sækja og starfa innan.

„Við trúum frásögnum kvennanna og teljum ólíðandi að persónuleg mörk hafi ekki verið virt, þar með virðing fyrir tilfinningum og einkalífi þeirra,“ segir í yfirlýsingunni. „Okkur þykir afar sárt að konurnar, sem komu fram, hafi þurft að ganga í gegnum þá eldraun að verja sín eigin mörk og siðferðiskennd á opinberum vettvangi með kærum og öðrum opinberum hætti. Persónuleg mörk eiga með réttu að vera tryggð í siðareglum Þjóðkirkjunnar og með skýrum reglum um viðbrögð við siðferðis- og agabrotum þeirra sem starfa í kirkjunni. Teljum við rétt að farið verði yfir þær siðareglur og þær bættar í ljósi þessara siðferðisbrota.“