Mike Pence, vara­for­seti Banda­ríkj­anna, lýsti á fundi um gagn­kvæm milli­ríkja­við­skipti Banda­ríkj­anna og Íslands í dag, áhyggjum af umsvifum Kínverja og Rússa í nálægð við Ísland.

Pence beindi orðum sínum að Guðlaugi Þór Þórð­ar­syni utan­rík­is­ráð­herra og sagði Ísland vera stað­ett í „æ mik­il­væg­ari hluta heims­ins, ekki aðeins efna­hags­lega, heldur hern­að­ar­lega.“

„Herra utan­rík­is­ráð­herra. Þú veist af áhyggjum okkar af auk­inni umferð rúss­neska sjó­hers­ins á norð­ur­slóðum, þeim áhyggjum sem við höfum af auknum áhuga Kínverja, ekki bara á fjár­fest­ingu, heldur á örygg­is­málum og við­veru á svæð­inu,“ sagði Pence.

Pence sat fund með Guðlaugi Þór Þórð­ar­syni utan­rík­is­ráð­herra að loknum fundi sínum með Guðna Th. Jóhann­essyni for­seta Íslands í Höfða. Að loknum fundi Guðlaugs Þórs og Pence sátu þeir fund um gagn­kvæm milli­ríkja­við­skipti þjóð­anna þar sem saman voru komnir full­trúar við­skipta­lífs land­anna beggja. Meðal við­staddra voru Birna Ein­ars­dóttir, banka­stjóri Íslands­banka, Bogi Nils Bogason, for­stjóri Icelandair, Halldór Benjamín Þor­bergs­son, fram­kvæmda­stjóri Samtaka atvinnu­lífs­ins, og Sigurður Hann­es­son, fram­kvæmda­stjóri Samtaka iðn­að­ar­ins.

Pence í HöfðaÁ mynd­inni sést Mike Pence, vara­for­seti Banda­ríkj­anna, heilsa Halldóri Benjamín Þor­bergs­syni, for­manni Samtaka atvinnu­lífs­ins. Að baki þeim standa meðal ann­arra Árni Oddur Þórð­ar­son, for­stjóri Marel, og Bogi Nils Bogason, for­stjóri Icelandair.

Mynd: Rúv

Guð­laugur Þór lýsti því að það væri mikið ánægju­efni að fá að hitta Pence og það væru mikil for­rétt­indi að hann væri kom­inn hingað til lands. „Vera þín hér, herra vara­for­seti, varpar ljósi á sterk tengsl og sam­starf Íslands og Banda­ríkj­anna.“ Hann lagði líka áherslu á að við­skipti milli land­anna tveggja væru mikil og í vexti. Banda­ríkin væru þannig stærsta við­skipta­ríki Íslend­inga, og stæðu að baki 16 pró­sentum í milli­ríkja­við­skiptum Íslands. Þá væru beinar fjár­fest­ingar Banda­ríkja­manna á Íslandi hinar mestu af öllum ríkjum. Loks vakti hann máls á áhuga Íslend­inga á að stofna til frí­versl­un­ar­samn­ings við Banda­ríkin.

Pence bar fram ham­ingju­óskir vegna mik­ils vaxtar í efna­hags­lífi Íslend­inga. Hann taldi að rekja mætti þann vöxt að ein­hverju leyti til góðs gengis í efna­hags­lífi Banda­ríkj­anna, sem hann rakti til aðgerða Donalds Trumps Banda­ríkja­for­seta. „Efna­hags­líf ykkar er í miklum vexti. Og ég trúi því að það sé að hluta til vegna horfa í efna­hags­lífi Banda­ríkj­anna, sem er líka í vexti. Þökk sé for­ystu Trumps for­seta er gríð­ar­legur upp­gangur í banda­rísku efna­hags­lífi,“ sagði Pence.

Pence taldi lík­legt að ein­hver hluti þeirra 700 þús­und banda­rísku ferða­manna sem komu til Íslands á síð­asta ári hefðu komið hingað vegna hinnar góðu efna­hags­legu stöðu sem leið­toga­hæfi­leikar Trumps hefðu leitt til.