RÚV mun fá styrki til að koma til móts við þá tæpu 2 milljarða í tekjur sem tapast fari fjölmiðillinn af auglýsingamarkaði. Þá eru einnig til skoðunar leiðir til að jafna stöðu íslenskra og erlendra fjölmiðla á auglýsingamarkaði, að því er haft er eftir Lilju Alfreðsdóttur, mennta- og menningarmálaráðherra, í Morgunblaðinu í dag.
„Ég hef talað fyrir því að við horfum til Norðurlandanna,“ segir Lilja. „Þar eru ríkisfjölmiðlarnir ekki á auglýsingamarkaði. Ég teldi farsælast að svo væri líka á Íslandi, ásamt því að vera með styrki til fjölmiðla, eins og boðað er í fjölmiðlafrumvarpinu. Ég sé fyrir mér að ef RÚV fer af auglýsingamarkaði verði stofnuninni bætt það upp. Ég vil að okkar RÚV sé álíka sterkt og ríkisfjölmiðlar á hinum Norðurlöndunum. Það sem er hins vegar slæmt við íslenskan fjölmiðlamarkað er að starfsskilyrði einkareknu fjölmiðlanna eru mun lakari en á hinum Norðurlöndunum og við verðum að breyta því.“
Ráðuneytið hefur einnig til skoðunar leiðir til að jafna stöðu íslenskra og erlendra fjölmiðla á auglýsingamarkaði, en virðisaukaskattur er greiddur hér á landi af innlendum auglýsingum en ekki af auglýsingakaupum hjá erlendum miðlum. „Þetta er stórmál og við verðum að ná utan um þetta. Við notum enda fjölmiðla með allt öðrum hætti en fyrir aðeins tveimur árum. Við erum að vinna þetta með fjármála- og efnahagsráðuneytinu af því að þetta er skattamál. Norðurlöndin eru að skoða þessa leið sem og Evrópusambandið líka, vegna þess að við erum að verða af skatttekjum út af þessu breytta hagkerfi. Þetta var einmitt ein af niðurstöðum G20-fundarins hjá fjármálaráðherrunum. Öll þessi ríki ætla saman að beita sér fyrir því að þessi alþjóðlegu stórfyrirtæki séu skattlögð. Þetta þurfum við að gera í alþjóðasamstarfi,“ segir Lilja.
Magnús Geir Þórðarson útvarpsstjóri segir mikilvægt að halda úti öflugri almannaþjónustu, en auglýsingatekjur RÚV hafi dregist saman undanfarin ár. „Ef núverandi fjármögnunarleið verður endurskoðuð þarf að tryggja að RÚV geti áfram sinnt sínu mikilvæga hlutverki og þjónusta skerðist ekki, enda væri það í andstöðu við vilja almennings samkvæmt könnunum,“ segir hann. „RÚV starfar eftir þeim lögum og reglum sem um stofnunina gilda. Alþingi ætlast til að RÚV afli um þriðjungs tekna sinna í gegnum auglýsingasölu og eftir því höfum við starfað. RÚV, eitt og sér, tekur engar ákvarðanir um breytingar á fyrirkomulagi fjármögnunar RÚV. Það er viðfangsefni löggjafans.“
Fjölmiðlamál
Öll stærri einkarekin fjölmiðlafyrirtæki rekin með tapi fyrir greiðslu fjölmiðlastyrkja
Hundruð milljóna taprekstur fjölmiðla telst ekki til fjárhagserfiðleika
Kolbrún og Kristín óska eftir rökstuðningi frá RÚV
Tengja uppsagnir hjá Morgunblaðinu við kjarabaráttu: „Þér kemur einfaldlega ekkert við hvað ég er með í laun“
Eyþór Arnalds: „Ósæmilegt að segja að Samherji sé einhvers konar mútufélag“
Athugasemdir