Guðjón S. Brjáns­son, þing­maður Sam­fylk­ing­ar­innar og full­trúi flokks­ins í for­sætis­nefnd Alþingis, segir „ótækt“ að póli­tískir full­trúar hafi úrslita­valdið við afgreiðslu mála er varða brot á siða­reglum.  

Þetta kemur fram í bókun sem hann lagði fram á fundi for­sætis­nefndar á föstu­dag.

Eins og fram kom í fjöl­miðlum í dag hefur nefndin fall­ist á þá nið­ur­stöðu siða­nefndar að Þór­hildur Sunna Ævars­dóttir hafi gerst brot­leg við siða­reglur þegar hún sagði í Silfrinu þann 25. febr­úar 2018 að uppi væri rök­studdur grunur um að Ásmundur Frið­riks­son hefði dregið sér fé.

Guðjón setur sig ekki upp á móti nið­ur­stöðu for­sætis­nefndar en seg­ist telja mik­il­vægt að siða­nefndin hafi „fullt og milli­liða­laust umboð til að kveða upp úrskurði um álita­mál sem upp koma vegna þing­manna“. Fyr­ir­komu­lag þar sem for­sætis­nefnd sé „milli­liður við slíka afgreiðslu“ hafi reynst gallað.

„Eftir að þingið setti sér siða­reglur hefur aðeins einn þing­maður verið tal­inn brot­legur við þær, fyrir að taka þátt í opin­berri umræðu um meint brot ann­ars þing­manns, og þá vegna orða­lags fremur en inn­taks,“ segir Guðjón í bókun sinni og bætir því við að þetta sé „óheppi­legt fyrir þingið, ásýnd þess og störf“. Engu að síður hljóti hann að „lúta nið­ur­stöðu siða­nefndar“.