Karlar hafa sett af stað keðjuáskorun sem gengur nú á Facebook þar sem þeir skora á kynbræður sína að styðja við stofnun Málfrelsissjóðs sem nú er unnið og áður hefur verið greint frá í Stundinni. Rithöfundurinn og myndlistarmaðurinn Hallgrímur Helgason hratt áskoruninni af stað fyrr í dag og hvetur aðra karla til að leggja sitt af mörkum.
„Fréttir síðustu mánaða, þar sem konur eru ítrekað sektaðar, siðaðar eða áminntar fyrir afbrot karla, sýna og sanna að það er full þörf á fjárstuðningi til handa þeim óbreyttu konum á gólfinu sem lögfræðiteymin sækja að. Við karlar eigum líka að leggja í púkkið, og ég starta hér keðjuáskorun til karla,“ segir meðal annars í Facebook-færslu Hallgríms, sem fer nú víðar á netinu. „Hópur kvenna hefur stofnað málfrelsissjóð á söfnunarsíðunni Karolinafund í þeim tilgangi að draga úr ótta kvenna við að tjá sig um kynbundið ofbeldi og tryggja að fjárhagsáhyggjur bætist ekki við það andlega og tilfinningalega álag sem fylgir því að tala um kynbundið ofbeldi,“ skrifar Hallgrímur og sendir boltann á Berg Þór Ingólfsson leikara og leikstjóra.
„Það virðist vera lenskan að það séu konur sem benda á eða tjá sig um mál sem fá síðan að kenna á því, eins og til dæmis Bára [Halldórsdóttir] sem er sú eina sem hefur fengið einhvers konar áminningu í Klausturmálinu. Hið sama má segja um um til dæmis Þórhildi Sunnu [Ævarsdóttur] sem fékk áminningu fyrir að segja það sem satt var. Það virðist augljóst að það er þörf á einhverjum sjóði til að styðja við konur sem ekki eiga neina varasjóði til að borga lögfræðingum, fyrir það eitt að hafa tjáð sig. Ég vil bara leggja mína hönd á plóginn með þessu og hvet aðra karla til hins sama,“ segir Hallgrímur í samtali við Stundina og bætir við að sjálfsagt sé að fleiri taki þátt í áskoruninni án þess að bíða eftir að keðjan sem hann setti af stað nái til þeirra.
Nú þegar hafa, auk þeirra Hallgríms og Bergs, þeir Karl Ágúst Úlfsson leikari og Svavar Knútur tónlistarmaður fengið áskorunina. Nú þegar hafa safnast tæpar 2 milljónir króna en markmið söfnunarinnar er að ná 20.000 evrum, rúmum 2,8 milljónum króna, í það minnsta fyrsta kastið.
Athugasemdir