Siðanefnd Alþingis hefur komist að þeirri niðurstöðu að Þórhildur Sunna Ævarsdóttir, þingmaður Pírata, hafi brotið siðareglur fyrir alþingismenn þegar hún sagði í Silfrinu þann 25. febrúar 2018 að uppi væri rökstuddur grunur um að Ásmundur Friðriksson þingmaður hefði dregið sér fé.

Stundin fjallaði ítarlega um málið í morgun og setti í samhengi við önnur siðareglumál sem flestum hefur verið lokað af forsætisnefnd án þess að óskað væri álits frá siðanefnd Alþingis. Er Þórhildur Sunna þannig fyrsti alþingismaður sögunnar sem talinn er hafa brotið siðareglur. 

Þegar Þórhildur Sunna lét hin þungu orð falla um Ásmund og akstursgreiðslur hans lá fyrir að  þingmaðurinn hafði fengið 4,6 milljóna króna aksturskostnað endurgreiddan frá Alþingi vegna 48 þúsund kílómetra aksturs á eigin bíl þrátt fyrir að reglur um þingfararkostnað kveði á um að þingmenn sem aka meira en 15 þúsund kílómetra á ári skuli notast við bílaleigubíl og siðareglur leggi þá skyldu á herðar þingmönnum að sjá til þess að endurgreiðsla fyrir útgjöld sé „í fullkomnu samræmi“ við reglur um þingfararkostnað. Sjálfur hefur Ásmundur viðurkennt að hluti af endurgreiðslunum hafi „orkað tvímælis“ og endurgreitt skrifstofu Alþingis 178 þúsund krónur sem hann fékk vegna ferða um kjördæmi sitt með tökufólki frá sjónvarpsstöðinni ÍNN.

Ásta Ragnheiður Jóhannesdóttir, formaður siðanefndar Alþingis, vék tímabundið úr siðanefndinni af persónulegum ástæðum. Kom það því í hlut varamanns hennar, Jóns Kristjánssonar fyrrverandi ráðherra og þingmanns Framsóknarflokksins, að gegna formennsku í nefndinni. Auk hans standa að álitinu þau Margrét Vala Kristjánsdóttir, lektor við lagadeild Háskólans í Reykjavík og Róbert H. Haraldsson, heimspekingur og sviðsstjóri kennslusviðs við Háskóla Íslands. 

Að mati siðanefndar voru ummæli Þórhildar Sunnu til þess fallin að kasta rýrð á Alþingi og skaða ímynd þess. Nefndin bendir á að verulegt vantraust ríki gagnvart Alþingi og segir að það sé að miklu leyti vegna „samskiptamáta þingmanna“. Telur siðanefndin að „órökstuddar aðdróttanir“ Þórhildar Sunnu gagnvart Ásmundi hafi „óneitanlega neikvæð áhrif á traust almennings til Alþingis“. 

Mikil umræða hefur farið fram um niðurstöðuna í fjölmiðlum og á samfélagsmiðlum í dag. Stundin birtir nú hið ráðgefandi álit siðanefndar í heild svo lesendur geti glöggvað sig á forsendum og rökstuðningnum milliliðalaust.