Þrír ráðherrar sátu hjá þegar greidd voru atkvæði um grundvallarákvæði í frumvarpi Svandísar Svavarsdóttur heilbrigðisráðherra til laga um þungunarrof.
Þetta voru þau Bjarni Benediktsson, Guðlaugur Þór Þórðarson og Lilja Alfreðsdóttir, en um er að ræða 4. gr. frumvarpsins um rétt kvenna til að rjúfa þungun fram til loka 22. viku meðgöngu. Aðeins sex þingmenn Sjálfstæðisflokksins studdu ákvæðið, sjö sátu hjá og einn greiddi atkvæði gegn því.
Annarri umræðu um frumvarpið er nú lokið og gengur málið aftur til velferðarnefndar.
Þingmenn Miðflokksins og Flokks fólksins og trúfélög hafa gagnrýnt ákvæðið um rýmri rétt til þungunarrofs harðlega en efni þess er í samræmi við ráðgjöf fagaðila, svo sem Félags íslenskra fæðingar- og kvensjúkdómalækna og Landspítalans.
Auk ráðherranna þriggja sátu fimm þingmenn Sjálfstæðisflokksins hjá, þeir Haraldur Benediktsson, Jón Gunnarsson, Njáll Trausti Friðbertsson, Óli Björn Kárason og Páll Magnússon.
„Ég mun ekki greiða atkvæði um fjórðu greinina eins og ég kom að hér áðan og það geri ég í trausti þess að velferðarnefnd taki málið aftur til umfjöllunar og geri nú tilraun til þess að skapa víðtækari sátt í jafn viðkvæmu máli og hér um ræðir,“ sagði Óli Björn. „Það er mín eina ósk að það sé gerð sú tilraun. Og að menn hlusti á þessar viðkvæmu raddir sem að hér hafa komið fram. Ég mun því ekki greiða atkvæði herra forseti.“
10 þingmenn lögðust gegn ákvæðinu, Ásmundur Friðriksson úr Sjálfstæðisflokknum, Anna Kolbrún Árnadóttir, Birgir Þórarinsson, Karl Gauti Hjaltason, Ólafur Ísleifsson, Sigmundur Davíð Gunnlaugsson, Sigurður Páll Jónsson og Þorsteinn Sæmundsson úr Miðflokknum og Guðmundur Ingi Kristinsson og Inga Sæland úr Flokki fólksins.
Athugasemdir