Brynjar Níelsson, þingmaður Sjálfstæðisflokksins, er þeirrar skoðunar að Stígamót sannfæri konur sem stundað hafa vændi um að brotið hafi verið gegn þeim. Fram að því að konurnar leiti til Stígamóta sé upplifun þeirra önnur. Stígamót hafa boðið Brynjar í heimsókn til að fræða hann um starfsemi samtakanna, um afleiðingarnar sem kynferðisofbeldi hefur fyrir brotaþola og til að koma í veg fyrir að hann fari með frekari rangfærslur.

Brynjar var gestur í þættunum Harmageddon á útvarpsstöðinni X-inu í gærmorgun þar sem talið barst meðal annars að viðtali við íslenska konu í kvöldfréttum Stöðvar 2 síðustu helgi. Konan hafði stundað vændi í Reykjavík um nokkurra ára skeið og greindi hún frá því að þekktir og valdamiklir menn væru meðal vændiskaupenda í Reykjavík. Hún hafði leiðst út í vændi árið 2010 vegna mikillar fátæktar en konan er öryrki og einstæð móðir. Hún leitaði sér aðstoðar hjá Stígamótum og Bjarkarhlíð og gat hætt í vændi árið 2016. Konan sagðist vilja kæra mennina sem keyptu aðgang að líkama hennar en að slíkt hefði ekkert upp á sig þar sem brot af þessu tagi fyrnast á tveimur árum. Það finnst henni mjög miður þar sem fólk þurfi oft á tíðum lengri tíma en svo til að takast á við ítrekað og alvarlegt ofbeldi sem felist í vændi.

Kallar andstöðu við vændi „feðraveldishugmyndafræði“

Í viðtalinu í Harmageddon lýsti Brynjar því að hann teldi að þessar hugmyndir konunnar væru partur af pólitískri hugmyndafræði sem hann kallaði feðraveldishugmyndafræðina sem gengi út á að konur bæru enga ábyrgð á hegðun sinni. „Ég hef auðvitað alltaf sagt að kynlífsviðskipti sem eru auðvitað á milli tveggja, að annar þeirra sé brotlegur en hinn ekki, það er hluti af þessari hugmyndafræði, feðraveldishugmyndafræði. Konan er hin kúgaða og karlinn er gerandi. Þess vegna er þetta gert að kynferðisbroti, kaupin. Þetta er auðvitað eins vitlaust lögfræðilega og allt einhvern veginn eins og hægt er að hafa það.“

„Þú getur alveg rökstutt að enginn kaupi
vændi nema það sé í einhverri neyð“

Annar þáttastjórnenda, Frosti Logason, benti þá á að í lögum um að kaup á vændi séu ólögleg og refsiverð sé tekið til greina að enginn leiðist út í vændi nema að viðkomandi sé í mikilli neyð. Brynjar greip þá fram í og sagði að að slíkt hið sama mætti segja um vændiskaupendur. „Þú getur alveg rökstutt að enginn kaupi vændi nema það sé í einhverri neyð. Hún er bara öðruvísi neyð. Ég er bara að segja: Taktu bara ábyrgð á sjálfri þér. Ef þú ert hins vegar neytt út í vændi, einhver neyðir þig út í slíkt, þá er það auðvitað sjálfstætt brot.“

Brynjar hélt svo áfram og beindi spjótum sínum að Stígamótum. Ekki var annað að skilja á honum en að hann teldi Stígamót hafa haldið þeirra skoðun að konunni að brotið hefði verið á henni; hún hefði ekki verið þeirrar skoðunar fyrr en eftir að hafa þegið aðstoð samtakanna. „Núna hefur hún áttað sig á því, þessi kona, mörgum árum seinna, að hún var fórnarlamb einhverra karla af því hún er búin að vera í sambandi við Stígamót. Hún áttaði sig greinilega ekki á því þegar hún var að þessu. Hún auglýsti, hún reynir að fá kúnnann. Af hverju tekur hún ekki ábyrgð á því?“

Vill afnema lög sem banna vændiskaup

Spurður hvort hann væri þá ósammála þeirri skoðun konunnar að fyrningarfrestur á brotum sem þessum væri of stuttur játti Brynjar því og sagði jafnframt að hann vildi afnema bann við kaupum á vændi. „Ég hefði bara viljað taka þetta út. Þetta er nú eiginlega bara hérna í Skandinavíu. Þetta er svona byggt á þessari femínísku, feðraveldishugmyndum.“

Eitt og annað væri gert til að sporna gegn vændisstarfsemi en svo lengi sem konur fengju ekki að selja sig og karlar að kaupa aðgang að þeim, réði enginn yfir eigin líkama í raun. „Við gerum ýmislegt. Þú getur ekki stofnað fyrirtæki, ráðið til þín fólk til þess að selja þjónustu, þú mátt ekki vera að díla með þetta. En það er bara hluti af frelsi konunnar og að ráða yfir líkama sínum, og karlinum líka, að stunda kynlífsviðskipti eins og allt annað. Menn eru mjög uppteknir af því að konan ráði yfir líkama sínum, hún má meira að segja deyða fóstur og núna samkvæmt nýju frumvarpi miklu lengur, á grundvelli þess að hún ráði yfir líkama sínum. Ef hún ræður yfir líkama sínum, af hverju má hún þá ekki stunda kynlífsviðskipti? Svo segja menn: Jú, hún má það. Karlinn má bara ekki kaupa. Þá er enginn að ráða yfir líkama sínum.“

„Ef hún ræður yfir líkama sínum, af hverju
má hún þá ekki stunda kynlífsviðskipti?“

Stígamót sendu í dag frá sér eftirfarandi tilkynningu á Facebook-síðu samtakanna: „Starfsfólk Stígamóta vill bjóða Brynjari Níelssyni alþingismanni í opinbera heimsókn til okkar til þess að kynna sér starfsemi Stígamóta. 
Við teljum afar mikilvægt að ráðamenn þjóðarinnar séu meðvitaðir um þær afleiðingar sem mæta brotaþolum kynferðisofbeldis. Við teljum líka afar mikilvægt að ráðamenn kynni sér þau viðfangsefni sem þeir ræða um á opinberum vettvangi þannig að ekki sé farið með rangfærslur.“